Gaur goizean Foru Aldundian Nola egin dute? Hizkuntza ohituretan eragiteko esperientzien bilduma aurkeztu dute prentsaurrekoan. Bertan, Bagera elkarteko kide eta bildumaren egilea, Idoia Trenor, Hizkuntza Berdintasuneko foru zuzendaria, Mikel Irizar, eta Donostiako Udaleko Euskara zerbitzuko zuzendaria, Edurne Otamendi egon dira.
Prentsaurrekoan azaldu dutenez, Bagera elkartetik jabetu ziren, azken urteotan Euskal Herriko hainbat txokotan, Euskaraz bizitzeko nahiari erantzuteko aktibazio proiektu berritzaileak jartzen ari zirela martxan; alegia, babes soziala, elkarlana eta gizarte ekimena oinarri gisa hartuta. Guztiak helburu batekin: ohikoak diren hizkuntza ohituretatik aldendu eta euskararen erabileraren mesedetan izango diren aldaketak probokatzeko aukera berriak sortzea. "Euskararen biziberritze prozesua bidegurutzean dago. Eta arriskua badugu bertan etsita geratzeko. Horregatik, egitasmo berri eta berritzaileek behar dute izan aurrera egiteko gakoa", adierazi du Mikel Irizarrek. Hizkuntza Berdintasuneko foru zuzendariaren esanetan "tokiko aktibazioa, ekimen soziala eta berrikuntza oinarri duten egitasmoek, horretarako bidea erakusten digute". Eta hor kokatu du Nola egin dute? Hizkuntza ohituretan eragiteko esperientzien bilduma liburua.
Tokiko aktibazioa, Mikel Irizarrek jakinarazi duenez, Gipuzkoako Foru Aldundiaren Euskara 4.0 estrategiaren ildoetako bat da. Honen helburua "hizkuntza berdintasuna bultzatzeko egitasmo berritzaileak indartzea" dela zehaztu du.