Euskaltzaleen Mugimenduak hizkuntza praktika berriak hedatuko ditu ziklo berrian

Euskaltzaleen Topaguneak urteko Batzar Orokorra egin berri du Durangoko Elkartegian. Besteen aldean berezia izan da aurtengoa, ziklo berri baten hasiera ez ezik, etorkizunera begirako bidea zehaztu baitu: Euskaltzaleen Topaguneak euskararen erabilera handitu dadin lan egingo du eta horretarako hizkuntza praktika berriak hedatuko ditu lau haizetara, herri dinamikak oinarri dituela.

Mugimenduak aurten hogei urte bete ditu eta azken urteetan izan duen bilakaera aztertzen aritu da. Besteak beste, bazkideengandik jasotako datuek diote hamar urteotan 600 boluntario gehitu direla Euskaltzaleen Topagunera. Hala, gaur egun, 20.000 bazkidek eta 2.000 boluntariok osatzen duten mugimendua.

Lankidetza indartu etorkinen elkarteekin

Datozen urteetan Euskaltzaleen Mugimenduak "lankidetza indartuko du etorkinen elkarteekin" eta "hizkuntza praktika berriak hedatuko dituzte elkarrekin, herriz-herri antolatuko diren dinamiken bidez". Halaber, "kulturgintza suspertzeko sormen eskolen bidea sustatuko du" eta gazte euskaltzaleen mugimendua indartzeko, Arabako gazte euskaltzaleek hasitako bideari lagunduz jarraituko du mugimenduak, gainontzeko lurraldeetan antzeko dinamikak bultzatuz.

"Euskarak 365 egun"

Hain zuzen ere hori da, euskararen erabilera handitzeko 2017an eta datozen urteetan Euskaltzaleen Topaguneak landuko duen proiektu nagusia. Bide horretan, "hizkuntza praktikatan eragiteko ekimenak herriz herri hedatzea izango da lehentasuna". 

2016 emankorra

Urteko Batzar Orokorrean iazko jarduera eta diru kontuak eta 2017rako plangintza eta aurrekontua landu dira. 2016ari dagokionez, diote "emankorra" izan dela eta "ohiko jarduerari eusteaz gain, hainbat ekimen berri gauzatu" direla.

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.