Hedabideen diru-laguntzetan "pausoak" eman direla dio Tokikom-ek eta bidea egiten jarraitzeko eskaera egin die erakundeei

Mirari Altube Arrese 2016ko uzt. 26a, 14:00

Euskara hedabideetan sustatzeko diru-laguntza deialdi berriak sortu dituzte aurten Nafarroako Gobernuak eta Arabako Foru Aldundiak. Eusko Jaurlaritzaren Hizkuntza Politikako Sailburuordetzak, berriz, egunotan atera du 2016-18 bitarteko deialdia. Bizkaiko Foru Aldundiarenak otsailean atera ziren, ohi bezala; eta Gipuzkoako Foru Aldundiak, azkenik, urte amaiera aldera egingo du. Hori horrela, Tokikomek diru-laguntzen gaineko balorazioa egin du.

Zera jakinarazi dute: "Urte erdia igarota, erakunde guztiekin izan ditugu harremanak, eta fruitu ezberdinak eman dituzte. Ez beti nahi bestekoak, baina hainbatetan emandako urratsak modu positiboan baloratzen ditugu". Era berean, "batera jarduteko prestasuna" agertu diete erakundeei eta eskaera egin "hasitako bidean sakontzeko".

Hona Tokikomeko kideek egin duten balorazioa erakundez erakunde:

Nafarroako Gobernua:

Nafarroako Gobernuak bere gain hartu du bertako hedabideei (euskarazkoak eta elebidunak, titularitate publikokoak eta pribatukoak) diruz laguntzeko ardura. Tokikomen ustez, euskara hutsezkoei emango dien diru laguntza hori ez da nahikoa, eta hurrengo urteei begira, euskara hutsezko hedabideen aldeko apustu sendoagoa eskatzen diogu.

HPS:

Gure eskaera historikoa izan den urte anitzeko planteamenduari heldu dio Jaurlaritzak, eta hori aurrerapausotzat jotzen dugu Tokikomen. Diru poltsa igo ez bada ere, %6 gehiago izango da EAEn dauden hedabideek eskuragarri izango dutena, Nafarroako Gobernuak bere gain hartu duelako bertako hedabideak diruz laguntzeko ardura.

Egungoen lana garatzen laguntzeko urrats garrantzitsua bada ere, ezin ahaztu sortu litezkeen proiektu berrietarako ez dela geratu lotuta laguntza politika. Hala ere, gai hau eta beste hainbat lantzeko mahai bat osatua dugu Jaurlaritza eta Hekimenen artean eta lan ildo horri eutsi nahi diogu datozen urtetan ere.

Gipuzkoako Foru Aldundia:

2016an inoiz baino diru-laguntza gehiago egongo dira Gipuzkoako euskara hutsezko komunikabideetara bideratuta. Ohiko deialdiaz gain, eskualdekako proiektuak sendotzeko deialdi berezi bat ere izango da. Biak ere albiste onak dira Tokikomen iritziz.

Arabako Foru Aldundia:

Arabako Foru Aldundiak lehenengo aldiz argitaratu du euskarazko hedabideei laguntzeko diru-laguntza deialdia, 50.000 euroz hornitua. Diru-poltsa txiki geratzen den arren, aurrerapausotzat jotzen dugu deialdia bera egitea.

Bizkaiko Foru Aldundia

Dagoeneko ebatzita dagoen deialdi bakarra. Aurten, hala ere, murriztu egin du euskarazko hedabideei laguntzeko diru-poltsa.  Lehengo poltsa nahikoa ez bazen ere, Aldundiaren erabaki honek gehiago estutzen ditu Bizkaiko euskarazko toki komunikabideak.

Deialdiak asko atzeratu dira aurten (Bizkaikoa salbu) eta horrek eragin zuzena du gure jardunean. Espero dugu neurriak hartzea eta ez errepikatzea. Helburuak konpartitzen ditugu eta Tokikomen prest gaude behar den leku guztietan lanean jarraitzeko.

ALBISTEAK ESKUKO TELEFONOAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.

ASTEBURUETAKO BULETINA

Zure posta elektronikoan asteburuko albiste nabarmenekin osatutako mezua jasoko duzu. Harpidetu zaitez debalde hemen.


Harpidetza aukera guztiak