400 kilometro bizikletaz, AHTren lotuneraino

Txirrinkaren lekukoa.

Txirrinka txandakako bizikleta martxak lortu ditu nahikoa parte-hartzaile maiatzaren 20tik 22ra, Hego Euskal Herriko lau probintziak zeharkatuz 400 bat kilometroko bizikleta martxa gauzatzeko, Angiozarreraino. "Ziurtatuta dugu hiruzpalau lagun puntu bakoitzean izango direla kilometro bakoitza hartzeko", adierazi du Mila Elortzak, AHT Gelditu! Elkarlaneko ordezkariak.

Elortzak gaineratu du Korrikak bezala, Txirrinkak ere bere lekukoa izango duela –argazkian–, berezi askoa, ze lau zatitan banatu eta zutabe bakoitzak Debagoieneraino ekarriko du zati bana, harik eta maiatzaren 22an Angiozarren lekukoa osatu arte. "Zati bakoitza da hazi bat ernetzen balego moduan, eta hazi guztiak hemen Angiozarren lotuko ditugu. Ingurumenaren aldeko lekukoa da", dio Elortzak.

Angiozar, 'Y'-aren muino

Izan ere, Txirrinka "AHTaren eta proiektu txikitzaileen kontrako borroka" dela azpimarratu du hark. "Helburua da jendearengan eragitea, ikusarazteko ze gizarte eredu ari garen modelatzen; ez gabiltza pentsatzen etorkizuneko pertsonengan; ari gara haiek inongo baliabiderik gabe lagatzen, eta hori oso larria da. Urteotan azpiegitura erraldoien plangintza eta eraikuntza amorratua izan da: AHTa, fracking-a, Garoña, errauskailua, goi tentsioko lineak… Proiektu horiek gauzatzeko baliabide naturalak zein ekonomikoak izan dira euskarri eta ingurua, berriz, hondakindegi. Txirrinka bukatzeko Angiozar aukeratu da, Euskal Y-a izenez ezagutzen delako Euskal Herriko AHTaren ibilbidea, eta Y elkartzen den muinoa da Angiozar. Obrak orain hasi dira, zundaketak egiten, baina beste ezer eraikitzen hasi barik dagoen lekua da".

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.