Preso politikoen egunean Bilbon izango den manifestaziorako autobusak antolatu dituzte

Domeka honetan, apirilak 17, Amnistiaren norabidean, preso eta iheslariak etxera lelopean manifestazio nazional bat antolatu dute Bilbon, eta hainbat debagoiendar ere bertan izango dira.

Apirilaren 17a Preso Politikoen Nazioarteko Eguna da mundu osoan, eta honen harira preso eta iheslari euskaldunen etxeratzea eskatu nahi dute domekako manifestazioarekin. Manifestazioa eguerdiko hamabietan abiatuko da Bizkaiko hiriburuko La Casilla plazatik.

Hori dela eta, eskualdeko hainbat herritan autobusak antolatu dituzte jendea manifestaziora joan dadin. Gaur arte, egubakoitza, izango da txartelak erosi edo zerrendatan izena emateko azken eguna, ohiko puntuetan (Arrasate: Irati; Bergara: Arrano, Pol-Pol; Oñati: Arrano; Aretxabaleta:Urbaltz; Antzuola: Aitz-Garbi); Aramaio: Añai).

Domekan, goizeko 10:00ak eta 10:30ak bitartean aterako dira autobusak herrietako geltokietatik Bilborantz.

Eskualdeko preso ohien deia

Joan den astean, Debagoieneko hirurogei preso eta iheslari ohik agerraldia egin zuten herritarrei asteburu honetako manifestaziora dei egiteko. Bertan adierazi zuten euskal gatazkaren funtsezko arrazoiak hor dirauela oraindik, estatu espainiarrak eta frantziarrak Euskal Herriari bere geroa eraikitzeko aukera bahitu diotela-eta.

Bestalde, nabarmendu zuten borroka soilik molde politiko eta demokratikoetatik jorratzeko ezker abertzale osoaren hautua fermuki babesten dutela. Hala, Euskal Preso Politikoen Kolektiboarekin bat egiten dutela eta presoen etxeratzea lortzeko lege-baliabideak erabiltzea babesten dutela ere gehitu zuten.

Erlazionatuak

Hilaren 17an Bilbon izango den manifestazioan parte hartzera dei egin dute ibarreko preso ohiek

Debagoiena

Debagoieneko hainbat preso eta iheslari ohik agerraldia egin zuten atzo Arrasateko Kulturaten apirilaren 17an Bilbon izango den preso eta iheslarie...

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.