Aste Santuak turistak ekarri ditu Debagoienera

Turistak Oñatiko Sancti Spiritus unibertsitateko bisita gidatuan

Gaur, domeka,  eguraldi ona aprobetxatuaz jende dezentek aprobetxatu du goizez, esate baterako, Oñatiko herrigunean zehar turismoa egiteko, Sancti Spiritus unibertsitatea edota Txokolateixia bisitatuaz. Bisita gidatuak egitera ere animatu denik izan da. Euskal Herritik zein kanpotik etorritako jendea dabil egunotan eskualdeko herrietan. Gatz museoan edota Arrikrutzeko kobetan, esaterako, beste urte batzuetan baino bisitari gehiago izaten ari dira.

Asteburuko eguraldi ona aprobetxatu dute Euskal Herriko hainbat tokitatik etorritako jendeak gure herriak eta museoak bisitatzeko. Gaur eguerdian, esaterako, Oñatin jende ugari ikusi ahal izan da herrigunean foiletoak eskuan eta argazkiak ateratzen.

Baina bisitariak kanpotik ere etorri dira. Bergarako turismo bulegoan, esaterako azaldu dute Euskal Herritarrez gain, espainiar estatutik ere jende dezente etorri dela, Madril edo Gaztela aldetik, esaterako. Bergararen kasuan, eguenean izan zen mugimendu gehien, turistaz betetako autobus bat etorri zen-eta herriko monumentuak eta Laboratorium museoa ezagutzeko bisita gidatua egitera.

Arrikrutz eta Gatz museoa

Oñatiko Arrikrutz kobetan ere, opor egun hauetan bisita asko izaten ari direla azaldu dute. Gaur bereziki kanpotik etorritako jendea izan dute, eta aurreko egunetan, berriz, euskal herritarrak nagusiki, Gipuzkoa eta Bizkaia aldekoak bereziki, baina baita Nafarroatik etorriak ere, adibidez.

Beste urte batzuekin alderatuta, jende gehiago bertaratu dutela azaldu dute, eta azken txanpa honetan ere hala jarraituko dutela espero dute, erreserbak badituzte-eta.

Gauza bera adierazi dute Leintz-Gatzagako Gatz museotik ere. "Gustora" daude han, inoiz baino jende gehiago dabilelako. Aurten museoak web orria jarri du martxan eta sare sozialetara jauzia ere eman du, eta arduradunek uste dute hori izan dela turista gehiago erakartzearen arrazoietako bat.

Eguenetik hasita, egunero egin dituzte bisita gidatuak, eta bihar ere, astelehena, egingo dute. Hori dela-eta, "oso pozik" daudela adierazi dute. Euren kasuan ere, euskaldunez gain kanpoko bisitariak ere izan dituzte, Burgos aldekoak bereziki.

Erlazionatuak

Turismo eskaintza zabala Aste Santurako Debagoienean

Debagoiena

Aste Santuko oporretan etxean geratzea erabakitzen dutenek aukera paregabea daukate Debagoienean turismo apur bat egin eta gertuko altxorrak ezagut...

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.