Mondragon Unibertsitateak eta Energiaren Euskal Erakundeak batera antolatutako dibulgazio jardunaldian industria arloko eragileak eta Mondragon Unibertsitateko ingeniaritza ikasleak izan dira; bertan, Euskadiko energia egoeraren berri izateaz gain, eraginkortasun, energia berriztagarri eta garapen industrialaren inguruko gogoetak entzuteko aukera ere izan dute bertaratuek.
Energiaren Euskal Erakundeak eta Mondragon Unibertsitateak lankidetza hitzarmen bat dute, gaur berretsi dena. Berrikuntza teknologikoari lotutako egitasmoak sustatzea eta industrian eragina duten prestakuntza programak egitea dira haren helburu nagusiak. Hitzarmen horren barruan egin da egubakoitzeko dibulgazio jardunaldia, Euskadiko egungo energia egoera aztertzeko eta berrikuntza teknologikoen adibide praktikoak erakusteko xedez.
Jardunaldian, Energiaren Euskal Erakundeko Teknika eta Azterlan ataletako zuzendariek luze eta zabal aritu dira egungo euskal energia sistemaz eta hurrengo hamarkadetan erantzun beharko dituen erronkez. Mondragon Unibertsitateko Energia Elektrikoan Ikerkuntzako koordinatzaileak, berriz, elektrizitate sektorearen erronka teknologikoen berri eman du. Horretaz gain, iazko ikasturteko ikasleek burutu zituzten proiektuak aurkeztu dituzte, hitzarmenaren esparruan dauden eta jadanik industrian aplikazioa duten egitasmoak, hain zuzen.
Ikasgela garatzea
Hitzarmenaren helburu nagusia da energia eta energia eraginkortasun ikasgela bat garatzea, energia alorreko industrian eragina duten berrikuntza teknologiko proiektuak egin ditzaten ikasleek, halakoetan interesa erakusten duten beste enpresa batzuekin batera. Era horretan, produktu industrialei transferentzia zuzena ekarriko dien teknologia berritzailea garatu nahi da, eta, ondorioz, hobekuntza teknologikoa, energia egoera eta lehiakortasun maila hobetzea, eraginkortasunaren bitartez.
Jardunaldia amaitu ondoren, Mondragon Unibertsitatearen eta Energiaren Euskal Erakundearen arteko lankidetza-hitzarmena berritu dute erakunde biotako arduradunek. Hitzarmenari esker, ikasturte honetako ikasleek zenbait egitasmo garatu ahal izango dute; adibidez, igogailuetan prestazio handiko ateen eragingailuen hobekuntza teknologikoak, salgaiak garraiatzeko eraginkortasunean hobekuntzak eta energia berriztagarriei lotutako proiektu berritzaileak; zehazki, biomasa-galdarak eta sare elektrikoak itsas energien alorrean aplikatzeko.