Euskal enpresek gero eta zor txikiagoa dute

Enplegu-geruzen araberako zorpetze guztiaren bilakaera.

Euskal enpresen zorra gero eta txikiagoa da. Zorpetze-ratio osoak agerian jartzen du kanpo-finantzazioaren eta baliabide guztien arteko erlazioa; %51,2, EAEko finantzaz besteko enpresetan 2013an, Eustaten datuen arabera. Ratio honek adierazten du aktiboaren erdia pasa beste batzuen baliabideekin finantzatuta dagoela. Aurreko urtearen aldean, %1,5 puntuz txikitu da. 

Enpresa ertainetan (50-249 langile) bakarrik egin du gora zorpetze-ratioak 2012.aren aldean; %55,2, 1,7 puntu gehiago. Enpresa handietan (249 langile baino gehiago), zorpetze maila %2,9 jaitsi zen; mikroenpresetan (10 langile baino gutxiago), %2,6.

Sektoreen arabera ere aldeak daude. Hala, ostalaritzaren zorpetzea azpimarratu behar da: bere ondarearekiko %75ekoa zen 2013an; eraikuntzan, %60,9koa; industrian, %50,4koa; eta merkatuko zerbitzuetan, %49,7koa. Erditik azpiko zorpetzea du ur-hornidura, saneamendu jarduera, hondakinen kudeaketa eta deskusatze sektoreak: %32,7.

Errentagarritasun txikiagoa

Finantza-errentagarritasunak erakusten du enpresaren jardueraren bidezko ondare garbitik abiaturiko batez besteko errentagarritasuna. 2013an %3,3 zen datua, 2012an baino %0,9 azpitik. Errentagarritasun onenak 50-249 langile bitarteko
enpresek (%5,7) eta 249 baino gehiagokoek (%5,6) dituzte. Txarrena (%1,2) mikro-enpresek.

Errentagarritasun ekonomikoaren ratioa 2013an %2,8 izan zen; aktibo guztien gainean enpresek lortutako batez besteko etekina adierazten du. Ratio honen bilakaera, enpresen multzorako, 2012ko %3,3tik 2013ko %2,8ra jaitsi da. Enpresa handiek (>=250 langile) errentagarritasun-ratiorik onena dute: %4,4. Beste muturrean, %1,6ko ratioarekin, mikroenpresak. Aipatzekoa da telekomunikazio enpresen errentagarritasun ratioa: %7,7.

Palanka-efektu finantzarioak esaten digu zein den enpresaren finantza-egituraren eragina haren finantza-errentagarritasunean; enplegu-geruza guztietan eta jarduera sektore nagusi guztietan (eraikuntzan izan ezik) positiboa da.

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.