Aizkorri-Aratz eremu bereziaren izendapenari alegazioak aurkezteko epea luzatzeko 500 eskaera

Ubane Madera 2015ko uzt. 31a, 15:04
Oñatiko baserritarrak eskaera sinatzen, eguaztenean.

500 eskaera aurkeztuko dizkiote Eusko Jaurlaritzari Aizkorri-Aratz inguruan lurrak dituzten edo lurren erabiltzaile diren beste horrenbeste debagoiendarrek. Eusko Jaurlaritzan aurkeztuko dituzte dokumentuak, hain justu ere, Aizkorri-Aratz parkea eremu berezi izendatzeari alegazioak aurkezteko emandako epea luzatzeko eskatzeko. Berez, abuztuaren 13an bukatuko da izendapen horri alegazioak aurkezteko epea.

Dokumentuetako batzuk dagoeneko aurkeztu dituzte, eta gainontzekoak astelehenean, abuztuaren 3an, eramango dituzte Eusko Jaurlaritzara. Beraz, eskaera bera aurkeztu gura duenak oraingo domekara arte, abuztuaren 2ra arte du dagokion dokumentua betetzeko epea. Nork bere esparruko auzo alkateari eska dakioke dokumentua.

Ulertzeko nekeza

Lau puntu aurkeztuko dizkiote Jaurlaritzari dokumentuon bitartez.

  • Ekainaren 16ko buletinaren arabera, epea abuztuaren 13an bukatuko da.
  • Administrazio Publikoaren praktika egokiaren kontra doa hori, epe ia baliogabea edo opor-aldia delako emandakoa.
  • Dokumentua ulertzeko edo interpretatzeko zailtasun handiak daude.
  • Informazio edo parte-hartze eskasa edo ia hutsala eman diete kaltetuei.

Leintz ibarra eta Oñati

Aretxabaletako, Eskoriatzako, Leintz Gatzagako eta Oñatiko herritarrak dira Aizkorri-Aratz eremuaren izendapenaren kontrako alegazioak lantzen dihardutenak. Aizkorri-Aratz natura parkea Kontserbazio Bereziko Eremu izendatzeak ondorio kaltegarriak izan ditzakeela uste dute.

Izan ere, natura parke osoaren %47 inguru Debagoieneko herrietakoa da. Oñatin 4.237 hektarea egongo lirateke KBE eremuan, Eskoriatzan 1.573 hektarea, Aretxabaletan 994 eta Leintz Gatzagan, azkenik, 784 hektarea. Eta lurron erabiltzaile eta jabe batzuen ustez, izendapen horrek ekarriko dituen debekuetako batzuk kaltegarriak izango dira eurendako.

ALBISTEAK ESKUKO TELEFONOAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.

ASTEBURUETAKO BULETINA

Zure posta elektronikoan asteburuko albiste nabarmenekin osatutako mezua jasoko duzu. Harpidetu zaitez debalde hemen.


Harpidetza aukera guztiak