Xterra triatloian Ruben Ruzafa eta Merce Tusell izan dira garaile

Gaurko Xterra Basque Country triatloian hiru diziplina konbinatu behar izan dituzte parte hartzaileek. Igeriketan, 1.500 metro egin dituzte, 38 kilometro bizikletan, eta 11 kilometro korrikan. Landan hasi da lasterketa, eta bukatu berriz Arantzazun. Eguraldia lagun, giro bikaina izan da eta lasterketa hasieran, zein helmugan jende asko batu da parte-hartzaileei animoak emateko.

Eliteko kategorian 130 pertsonak hartu dute parte. Horietatik azkarrena, Ruben Ruzafa izan da; 4:41:43 denborarekin. Familia guztia etorri zaio animoak ematera eta faborito izanik, lehena geratu da sailkapenean. Bigarrena berriz, Gonzalo Orozko izan da, 4:56:00 markarekin, eta hirugarrena aldiz; Jon Erguin izan da 5:04:01 denborarekin.

Open kategorian aldiz; 3:02:22ko denboraz, Angel Martinez izan da azkarrena. Bigarrena, Iban Urdangarin, 3:02:30eko denboraz, eta Alvaro Gomez hirugarrena 3:16:03 denborarekin. Kategoria honetan debagoiendar azkarrena Iker Beitia izan da eta seigarren postua lortu du, 3:21:55 denbora eginez.

Emakumezkoetan kataluniarrak nagusi

Eliteko kategorian emakume azkarrena, Merce Tuseill kataluniarra izan da, 4:51:38 denborarekin eta open kategorian lehen emakumezkoa berriz, Prat Triatló taldeko Monika Batlle kataluniarra izan da, 4:59:46 markarekin.

Merce Tuseill-en esanetan: "Oso gogorra izan da. Ura hotza zegoen Landan, baina uste baino hobeto egin dut. Bizikleta egin zait gogorrena, desnibel handia zegoen eta muskuluak asko nekatzen dituen bidea dago. Hala eta guztiz ere, paisaia izugarria da, eta asko disfrutatu dut".

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.