Bergarako Arrano eta Artatse konfiskatzeko agindua berretsi du Gorenak eta libre geratu dira Arrasate eta Oñatikoak

Jon Berezibar 2015ko eka. 18a, 15:00

Bergarako Arrano Taberna gaur, manifestazio orduan, itxita.

Herriko Tabernen auziaren barruan zeuden lokalak konfiskatzeko erabakia berretsi du Espainiako Auzitegi Gorenak. Horien artean daude Bergarako Arrano Taberna, Artatse elkartea eta Bergarako "ezker abertzaleko beste lokal batzuk". Arrasateko Irati eta Oñatiko Gorgo Mendi elkarteak libre utzi ditu epaileak eta ez dituzte konfiskatuko bi herriotako taberna edo elkarteak, epaiaren arabera. Epaiaren aurka elkarretaratzeak deitu dituzte Arrasaten, Bergaran, Oñatin eta Aretxabaletan.

Honako hauek dira hitzorduak:

Bergaran, 19:30ean, San Martin plazan, manifestazioa.
Arrasaten, 19:30ean, Herriko plazan Manifestazioa.
Oñatin, 20:00etan, Arrano Aurrean Asanblada informatiboa.
Aretxabaletan, 19:00etan, Herriko plazan, kontzentrazioa

Sententziak 107 taberna, egoitza edo elkarteren itxiera eskatzen du. "ETAren egitura finantzatzen" dutela frogatutzat eman du, hortaz, Espainiako Auzitegi Gorenak. Ramon Berdugo buru duen epaimahaiak bere egin du aurrez Auzitegi Nazionalak emandako tesia: "ETAren egituraren parte" dira HB, EH eta Batasuna, eta Herriko Tabernak, horiek finantzatzeko erabili dira.

107 guztietatik bakarrik lauren helegiteak hartu dituzte aintzat epaileek: Oñatiko Gorgo Mendi eta Arrasateko Irati, eta Pasai San Pedroko Antxeta eta Harotz Toki. Beste guztiendako berretsi egin egin dute konfiskatze agindua.