Caser aseguru-etxeak egin du inkesta hori, 2012a ezkero guraso izan direnen edo umea espero zutenen artean. Ondorioak doitzeko, ama blogari talde batek ere parte hartu du. I Estudio Caser sobre Salud Familiar: Madres y Padres del siglo XXI du izena ikerketa horrek.
Ama blogari horiek kontziliazioaz esan dute arazoaren pertzepzioa arazoa bera den baino txikiagoa izan daitekeela, izan ere, "hiru aldeko kontziliazioa da, aitaita-amamak edo umearen beste zaintzaile batzuk ere sartzen direlako".
Umeek amarekin pasatzen dute denbora handiena; hala esan dute inkestatuen %67,5ek. Aitaita-amamen zaintzaile papera da guraso ez beste zaintzaileen artean baloratuena: 1etik 5era, 3,75ko batez bestekoa.
Hego Euskal Herrian eta Espainian 2012a ezkero umea izan duten familien profila honako hau da: 31 eta 40 urte arteko gurasoak, ume bakarra eta bi gurasoek osatutako familia; goi mailako ikasketadun gurasoak, espainiar nazionalitatedunak eta biak beste baten konturako langileak.
Gehienek, osasun publikoa
Osasuna eta hezkuntza dira gurasoen bi ardura handienak seme-alabei dagozkienez, hurrenkera horretan. Osasun publiko zerbitzuak dira inkestatutako gurasoen %65ek erabiltzen dituztenak; osasun pribatua aukeratzen dute %12k, eta %23k biak konbinatzen dituzte.
Hezkuntza sistema zenbateraino ezagutzen duten galdetuta, 1etik 5era, batez beste 3,7ko nota ematen dio gurasoak bere buruari; ama blogariek, aldiz, "ezjakintasun handia" dagoela eta norberaren seme-alaba hezkuntza sisteman sartzen denean bakarrik ezagutzen dela sistema esaten dute.
Ume bakarreko familien %62k haurreskola erabiltzen dute, baina portzentajea jaisten doa ume kopurua handitzen doan neurrian. Hala, bi seme-alaba dituzten familien erdiek bakarrik aukeratzen dute haurreskola, eta hiru dituztenen kasuan, %39,3k.
Diru laguntza "ezezagunak"
Diru laguntzei dagokienez, galdetutako gurasoen %58k ez dituzte haiek ondo ezagutzen. Ezagutzen dituztenen artean, PFEZeko dedukzioak dira neurri ezagunena (%62k ezagutzen dituzte). %13,6k ezagutzen dituzte familia ugariei eta guraso bakarrekoei laguntzak, eta %12,6k, bekak.
Hala ere, gehien eskatzen diren laguntzak ez dira horiek, baizik eta lanaren eta familiaren arteko harmonizazio hobea ahalbidetzen dutenak eta bajak luzatzeko aukera ematen dutenak.