Ogasun zuzendariaren esanetan, "udalek finantzazio zama astuna gainetik kentzea lortu dute legealdi honetan, egoerari aurre egiteko neurriak jarri baitziren".
Azaldu duenez, "2011n egoera konplikatua zuten udalek, besteak beste, zorpetze maila handia zutelako eta 2009ko foru funtsetik 99 milioi epeka itzultzen ari zirelako. 2012ko itzulketa ere esanguratsua zenez (51 milioi), Foru Ogasunak erabaki zuen gerorapen gehiago ez eskaintzea, etorkizuna ez hipotekatzearren". Aldundiak baliabide erabilgarrien %1 gehiago bideratzen du orain UFFFera (2012an puntu erdi igo zen eta beste puntu erdi 2013an).
Udalek gutxiago itzuli behar dute orain
Horrenbestez, hartutako neurri guztien bidez, udalek egin beharreko itzulketak gutxitu egin dira, eta era berean aurreikuspen zorrotzagoak ezarri dira, Ogasunak azaldu duenez. Modu horretan, 2014an likidazio positiboa izatea lortu da, 2007tik lehen aldiz. Hain zuzen, udalei 4.142.286,24 euro itzuli die Foru Ogasunak, UFFF likidatu eta gero; aurrekontua 413.130.249,43 eurokoa zen, eta likidazioa 418.272.535,67 eurokoa izan da. Kontu horiek otsailaren 17an onartu zituen Diputatuen Kontseiluak.
Debagoieneko udalei honako kopuru hauek (datuak, eurotan) itzuliko dizkie Foru Ogasunak:
• Antzuola: 12.303,65
• Aretxabaleta: 38.782,92
• Arrasate: 124.850,15
• Bergara: 83.438,13
• Elgeta: 6.362,75
• Eskoriatza: 23.031,50
• Leintz Gatzaga: 2.162,75
• Oñati: 63.511,83
• Denetara: 354.443,68