Arrasate-Udalatx Mendi Lasterketak 21 kilometro inguru izango ditu eta 1.300 metroko desnibela. Apirilaren 19an egingo dute eta domeka honetan, otsailak 1, zabalduko dute izen-ematea. Hori egiteko bi aukera daude: Internet bidez (herrikrossa.com webgunean sartuta) edo Arrasateko Korrika Trail dendan. Federatuta egonez gero, 20 euro ordaindu behar da; bestela, 23 euro. Elkartetik gomendatu dute azkar ibiltzeko. "Askori entzun diegu lasterketa egiteko gogoa dutela eta sare sozialen bitartez ere interes handia dagoela ikusi dugu, galdera asko jaso dugu-eta", esan du antolakuntza lanetan dabilen Iker Sarabiak.
Maila handiko korrikalariak
Mondraitz klubeko kideek lasterketa antolatzeko asmoa zutela iragarri zutenean, esan zuten herrikoia izatea gura zutela, baina maila handiko korrikalarien parte-hartzea espero zutela. Bada, Sarabiak baieztatu du Oihana Kortazar elgetarra eta David Lopez segoviarra etortzekoak direla.
Bestalde, prestatze lanak ondo doazela dio Sarabiak: "Oso aurreratuta ditugu lanak. Hala ere, aurrerago, deialdia egingo dugu lasterketa egunean bertan laguntzeko gertu egongo diren boluntarioak eskatzeko".
Urtarrilaren 16an ibilbidea probatu zuten antolatzaileek eta Aritz Gordok argazki ikusgarriak atera zituen. Hemen behean dituzue horietako bi ikusgai. Gordok bere Facebooken jarri zituen gehiago.