Goi-gamako linea batekin osatuko du katalogoa Fagor Berriak urte amaierarako

Fagor etxetresnen katalogo berrian aurki daitekeen hozkailuetako bat.

Fagor Berria hasita dago ekoizpenarekin eta abiarazte aldian, berebizikoak izango dira datozen hilabeteak. Labe, eltze ala indukzio-plakekin hasita daude jada. Orain, iragarri berri dute urte amaierarako gama altuko etxetresnen linea batekin osatuko dutela katalogoa, merkatu osora heltzeko. Estatuko merkatuaren %10a berreskuratzea espero du CNA Group-ek 2015ean, plan estrategikoan finkatu dutenez.

2015 urteko plan estrategikoaren ildo nagusietako bat izango litzateke produktuen katalogoa gama guztietara hedatzea. Fagor Etxetresnak zuen merkatu kuota berreskuratzea da helburu nagusia orain eta horretarako Bosch, Siemens ala itxiera aurretik Brandt etxeari saldutako De Dietrich marken parean jarri gurako lukete lehian.

Egoste tresnen ekoizpenarekin hasita – fase horri bultzada emateko Basauriko lantegian ere zenbait hilabetez ekoizpenari helduko diotela iragarri zuen CNA Groupek urte amaieran –; Fagor marka labe, indukzio-plaka eta presio-eltzeen alorrean gorenen lekuan kokatu gura du  enpresa talde kataluniarrak. Salmenta asmoei dagokienez, helburua estatatuko merkatuaren %20 berreskuratzea da 2015ean, 160 milioi euroko fakturazioarekin.

Jarduera beteko hilabeteak

Aurreratu dutenez, goi-gamako sorta berria "elitekoa, abangoardiako eta berritzailea" izango da, zenbait hedabidetan argitaratu denez eta berrikuntza eta garapenetako inbertsio handia egingo duela Fagor Berriak. Urte amaieran merkaturatu asmo dituzte produktu berriak, plangintza estrategikoan zehazturiko azken etapa baten. Lehenago, aipatutako egoste linearekin batera, urteko lehen hiruhilekoan Garagartzako lantegian garbigailuak ekoizten dira hastekoak. Arrasateko lantegian dagoeneko labe eta indukzio-plaken ekoizpenarekin hasita daude eta Basauriko lantegian termoak ere egingo dituzte, behin-behingoz, aurreikuspenen arabera, urtean aurrerago, ekoizpena Bergarara eroateko. Eskoriatzan ere talde lantalde txiki bat du CNA taldeak, presio-eltzeak egiten. 

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.