Aurreikusi bezala, prozesua aurten abiatuko da foru administrazioak Azkoitia, Villabona, Lasarte-Oria, Zumaia eta Elgoibarrekin sinatuko dituen bost eskualdatze hitzarmenen sinadurarekin. Debagoienean, Arrasate, Bergara eta Oñatiko eguneko zentro edo zaharren egoitzak hartuko ditu bere gain Kabiak.
Gizarte Politikako diputatu Ander Rodriguezek azaldu du konpetentzia aldaketa hau posible izango dela "Gipuzkoako Batzar Nagusietako talde sozialistarekin lortutako akordioari esker". Akordio honen arabera, urte honetarako aurreikusitako bost egoitzez gain, "Diputazioak, pixkanaka, lau urte baino luzeagoa izango ez den epe batean, beste 11 udal egoitzaren kudeaketa bere gain hartzeko konpromisoa" hartu du.
Rodriguezek sozialisten talde batzarkidearen "jarrera eta ardura eskertu" ditu, "prest" egon baitira "udal aldarrikapenei erantzun eta Gizarte Zerbitzuen Legea betetzen duen zerbitzuen kudeaketa publikoko eredura bideratutako eredu aldaketan laguntzeko".
"Enpleguen jarraikortasuna bermatu"
Diputatuak, era berean, berretsi egin du egoitza hauetako langileei zuzendutako lasaitasun mezua: beren "enpleguen jarraikortasuna bermatu" du, bai eta azpimarratu egungo lan baldintzak mantenduko dituela Aldundiak. Era berean, egoitzetan bizi diren pertsona eta hauen senideei esan die orain duten arreta eta zerbitzu bera jasotzen jarraituko dutela.
EAJ eta PP aurka
Foru Aldundiak eta sozialisten talde batzarkideak lortutako akordioa dela eta, EAJ eta PPk Kabiaren sorreraren kontra aurkeztutako osoko zuzenketak ez dira onartuko hilaren 22an Batzar Nagusietan izango den plenoan. Beraz, erakunde autonomoa sortzeko Foru Arauak bere tramitazio bidea jarraituko du Gizarte Politikako Komisioan eta bertan sartuko dira zuzenketak partzialak, Diputaziorik adierazi dutenez. Hurrengo osoko bilkurak berretsi beharko du Foru Araua ondoren.
Debagoieneko egoera
Arrasate
Eguneko zentroa Aita Mennik kudeatzen du egun, eta Iturbide zaharren egoitza Udalak; azken honek 202.367 euroko defizita eragin zuen 2011n. Diputazioari dagokio bata zein bestea kudeatzea.
Eskoriatza
Aita Menni arduratzen da eguneko zentroaz eta patronatu batek kudeatzen du zaharren egoitza.
Aretxabaleta
GSR zaharren egoitza pribatua da eta eguneko zentrorik ez dago; eskaera egiten dutenak Eskoriatzako eguneko zentrora bideratzen dituzte.
Bergara
Diputazioa arduratzen da eguneko zentroaren kudeaketaz eta Udala zaharren egoitzarenaz (Mizpirualde).
Oñati
Eguneko zentroa Aita Mennik kudeatzen du eta zaharren egoitza (San Martin) errektore batzorde batek.
Antzuola, Elgeta eta Leintz Gatzaga
Antzuolako eta Elgetako eguneko zentroak ez dira besteak modukoak; herri txikiak izatera, erabilera anitzeko herri zentroak dira. Beste zerbitzu batzuekin batera kudeatzen dituzte (babestutako etxebizitzekin batera) eta, horregatik, izaera berezia dute. Tokian tokiko udalek kudeatzen dituzte. Zaharren egoitzarik ez dago.
Leintz Gatzagan ez dago ez dago ez zaharren egoitzarik ez eguneko zentrorik.
Aramaio (Araba):
Eguneko zentroa dago bertan (Lurgorri). Udalarena da eta Kl kooperatibak gestionatzen du.
