Organikoaren bilketa bikoiztu egin da Gipuzkoan urtebetean Aldundiaren arabera

Aurtengo lehen zazpi hilabeteetan 13.294 tona materia organiko bildu dira konpostatzeko; iaz, urtarriletik uztailera bitartean, 6.791 tona bildu ziren Aldundiak emandako datuen arabera. Azaldu dutenez, "bi faktore eragiten ari dira aldaketa sako hau: batetik, udalerrietan hondakinak gaika biltzeko sistema eraginkorrak jarri izana; bestetik, herritarren konpromiso eta ahalegina.

Horren guztiaren ondorioz, gipuzkoarrek zabortegira gero eta hondakin gutxiago bidaltzen dutela azpimarratu dute: "Aurtengo lehen zazpi hilabeteetan iazko epe berean baino % 10,2 gutxiago eraman dugu; 101.908 tona aurten, eta 113.507 tona, 2013an".

Bada, datu horietan oinarrituta, aurten Gipuzkoan 170.000 tona inguru errefus sortzea aurreikusi du Foru Aldundiak, duela zazpi urte baino %38,5 gutxiago, alegia.

Iñaki Errazkin Ingurumeneko eta Lurralde Antolaketako diputatuaren arabera, datuok lurraldea norabide egokian doala agerian uzten dute eta norabide aldaketa honetako protagonistak herritarrak dira: “Eskerrak eman behar dizkiegu hondakinen alorrean gauzak txukun egiten ari diren milaka eta milaka gipuzkoarrei. Gipuzkoan aldaketa soziala ere badago arlo honetan: denok ohiturak aldatzen ari gara, eta hondakinak gaika sailkatzen, konpostatzen, arduraz jokatzen… ikasten ari gara. Beraz, Foru Aldundiaren izenean, herritarrei eskerrak eman behar dizkiet, haiek direlako aldaketa honetako protagonista nagusiak”.

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.