Cevitalek 28 milioi ordainduko lituzke berehala Fagor Etxetresnengatik

Cevitalek beste bost milioi ordainduko lituzke Fagor Etxetresnengatik, denetara 28, eta beste 50 lanpostu zuzen sortuko lituzke lehen urtean, denetara 400; horrez gain, zeharkako 1.000 lanpostu ere egongo lirateke. Horrela jakinarazi du Brandt-Cevitaleko presidente exekutiboak, Sergio Treviñok, gaur prentsaurrekoan.

Hori da behin betiko eskaintza. Astelehenean bukatzen zen azken eskaintzak egiteko epea. Momentu honetan ez da publiko egin CNA taldeak bere eskaintza hobetu duen; bertako komunikazio iturriek esan dute "oraingoz ez" dagoela enpresaren aldetik oharrik.

Cevitalek lehen momentuan ordaintzeko asmoari eusten dio; are gehiago, hasieran 18 milioi lehen momentuan ordaintzeko gertu bazegoen, orain 28 milioiak ordainduko lituzke erosketa formalizatu eta berehala, Treviñok esan duenez. Ez hori bakarrik: hiru urtean, 520 langile izango lituzke, Edesa, Fagor, Aspes eta Splendid markei eustea proposatzen duen plan industrial bati esker. Garagartza, Eskoriatza eta Bergarako lantegiak erosiko lituzke Cevitalek.

Cevitaleko ordezkariak esan duenez, Ecomac-ekin negoziatzen dabiltza. Ecomac-ek Edesa erosi nahi du eta lantegi horretan jarduerari eusteko negoziaziotan dabiltza.

Treviñok esan duenez, Cevitalen eskaintza "zuzena" da, izan ere, Fagor Etxetresnak berriz martxan jartzeko, 30 milioi baino gehiago inbertitu beharko dituzte.

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.