Apirileak jakin zen Yahoo, Facebook, Flickr ala Google-n bertan segurtasun hutsune oso handiak zeudela, erraldoi horien zerbitzarietarako sarbidea zabalik egon zela urte askoan eta milioika erabiltzaileren datuak zeudela konprometituta. Heartbleed izenez deitu zitzaion eskandaluari, OpenSSL segurtasun liburutegian akats larria agerian laga zuena, HTTPS segurtasun protokoloa kinkan zegoelarik.
Hala iragarri zutenez, apirilean bertan konpondu zen hutsunea eta erabiltzaileei deia luzatu zitzaien sareko kontuetako pasahitzak aldatu eta nabigatzaileak egunera zitzatela eskatuz. Google-k orain urrats bat gehiago egin gura du aurrera eta aitzindaritza hartu gura du, diotenez, halakorik atzera ez gertatzeko.
Inork sare erabat seguru eta kontrolatua nahi izatekotan, hori Google da, inondik ere. Google-ek sareko ia esparru guztiak ukitzen ditu, bilaketetatik hasita, merkataritza digitala tartean eta baita sistema eragile eta hardware alorrean.
Xehetasun larregirik eman gabe, iragarri dute hacker espezializatuak kontratatzen hasi direla, hain zuzen, halako hutsuneetara sartzen diren beste hacker-en mugimenduak gertutik zelatatu eta hortik ikasteko, teknikak eta bilatzen dutena atzemateko. Hesi digitaletan, firewall-etan ala segurtasun protokoloetan egiten dituzten hobekuntzak gainontzekoekin partekatzeko prest daudela esan dute Google-etik.