2013an baino %267 mugikor gehiago saldu dute Xiaomikoek 2014an eta urte erdian besterik ez, gainera. Smartphone-ak oso prezio merkean egiteagatik da ezaguna Txinako enpresa eta, hain zuzen, jaioterrian gotortu da, merkatu biziki zatikatuan eta prezio baxuan, lehiakideen prestazio maila bertsuko gailuak eskainita. Etxeko merkatuan hazita, mugez haraindi, asmo sendoz abiatu dira txinatarrak. Hala, emaitzek oraingoz, 2014ko lehen seihilekoaren salmentak jakinarazi berritan, zabalkundean asmatu dutela erakutsi dute eta iazko kopuru oso jada aurtengo lehen hilabeteetan gainditua zutela ikusi da.
Xiaomiren mugikorrek Android-en oinarritutako MIUI sistema eragilea darabilte eta 2014 urtean 60 milioi mugikor gura dituzte saldu.
Telebistak ere fabrikatzen ditu Xiaomi etxeak eta aurkeztu berri duten katalogoan tabletak ere badakartzate, dagoeneko. Hala eta guztiz ere, eta hazkundearen ziztu biziko bilakaera ikusita, ematen du oraindik orain Apple, Samsung eta Lenovok Txinako merkatu erraldoian duten nagusitza ukitzetik urrun dagoela Xiaomi. Are urrunago, analisten iritziz, enpreson mozkin maila handitik, Xiaomik merke bai, baina fabrikazio kostuaren prezio berean ala apur bat txikiagoan saltzen dituelako gailuak eta etekinak software-a eta zerbitzuak salduaz datozkiolako.