"Oso pozik gaude, ondo hasi dugu-eta kanpaina", adierazi du Lezetxikin lanean dabilen eta Ikerbasque-n ikerkuntzako irakasle den Maria Jose Iriartek. Izan ere, joan zen astelehenean ekin zioten aurtengo kanpainari eta lehen astean aurkikuntza "interesgarriak" egin dituzte. Esaterako, aurkitu dituzte: paleolitiko garaiko tresnak eta hartz eta basurde aztarnak.
Gizakiaren presentzia
Aurten eta iaz industen dabiltzan mailan gizakiaren presentzia handiago da adituaren arabera. Hain zuzen, gizakiak erabilitako tresneria aurkitu dute. "Aurkitu ditugun tresneria piezak ertza lantzen zitzaien harriak dira, beharrizanaren arabera landuak. Batzuk ertz zorrotzagoa izan dezakete haragia edo material organikoa mozteko, adibidez. Irten digunetako bat halakoa da, besteak ez." Datazio zehatzik ez duten arren, orain dela 160.000 urte inguruko piezak direla zehaztu du Iriartek. "Ez dauzkagu zehaztasunez datatuta, baina kronologia nahiko frogagarria da. Zaharragoak ere izan daitezke", zehaztu du.
Bestalde, animalia arrastoak ere aurkitu dituzte. "Fauna oso interesgarria irteten ari da, adibidez, hartz eta basurde aztarnak. Hortzak eta eskeletoko beste hezur batzuk aurkitu ditugu. Ez zaigu animalia osorik azaldu. Aurkitu ditugunek gizakiaren ustiapen markak dituzte". Materialarekin inbentarioa egin eta gorde egingo dute azterketak egiteko.
Uztailaren 19ra bitarte izango dira Lezetxikin indusketa lanetan eta material gehiago aurkitzeko esperantza dutela adierazi du Iriartek.