Aurten Sagastaren jaiotzaren mendeurrena dela aitzakia hartuta, Jose Antonio Azpiazu eta Xabier Ugarte oñatiarrek haren bizitzako gertakariak eta, besteak beste, musika alorrean egindako lanak batu dituzte Arrasateko eta Oñatiko Udalen laguntzarekin argitaratutako disko eta liburuan. Gaur, eguaztena, Arrasateko San Juan Batailatzailearen parrokian aurkeztuko dituzte, 20:00etan, Aitor Olea organistaren kontzertuaz jantzita. Ekainaren 25ean, berriz, Oñatiko San Migel parrokian, 20:00etan.
Gaztetatik musikazale
Oñatiko seminarioan egin zituen solfeo, piano eta organoaren lehenengo ikasketak eta Erroma bilakatu zitzaion gero On Giulianori musika bidea garatzeko toki pribilegiatua (horrela deitzen zioten Julian Sagastari Italian). Vatikanoko organistarekin ikasi zuen eta Erromako eta Sienako kontserbatorioetan ere bai.
1947. urtean Erromako basilika garrantzitsu batetako organista ofizialaren postua eskuratu zuen eta han jardun zuen, 1989. urtean erretiratu zen arte. Ospe handiko musikaria bilakatu zen eta Aita Santu askok eskatu zioten organoa jotzeko. Italian gainera, Alemanian, Suitzan eta Belgikan ere sarritan jotzen zuen eta baita Euskal Herrira etortzen zenean ere, Oñatin, Arantzazun eta Donostian, besteak beste.
Sagastaren musika ekarpena, baina, ez zen organora mugatu; askotariko ikerketa eta transkripzio lanak ere egin zituen.
Aurrena, baina, abade
Lehenengo abadea eta gero organista zela zioen Don Giulianok berak, eta haren lan pastorala ez zen musika arlora mugatzen. Erroma erabat hondatuta zegoen gerra ostean eta hiritik gertu zeuden errefuxiatuei laguntzen buru-belarri jardun zuen. Judutar familia asko ere ezkutatu zituen lagunen etxeetan.
Erromara hurbildutako euskaldunak ere ondo hartzen zituen Sagastak, ostatu egokiak aurkitu eta turista gida lanak eginez. Azpiazuk eta Ugartek dioten moduan: "Halakoa zen bera".
