Agerpen zuzena lortu dute 13 herrialdetan; azkena Txina izan da, bertan egindako aplikazio zentroaren bidez. Horrez gain, Alemania eta AEBetako ordezkaritzetan langile tekniko gehiago daude. Orotara 623 langile izatera ailegatu da egun Fagor Automation; horietako 233 nazioarteko lan taldekoak dira.
Produktuari dagokionez, Fagor taldearen zuzendaritzak eskaera sofistikatuago bati eman nahi dio erantzuna. Fagor 8060 kontrolaren industrializazioarekin, katalogoko eskaintza zabaltzen hasiko dira hilabete honetan bertan; aurrerakuntzak ekarriko ditu mekanizazio zentroetan eta zazpi ardatzeko tornuetan. Gainera, eskaintza aberastu egingo da mekanizatuen arloko zerbitzuekin: bost ardatz, abiadura handia eta makina konbinatuak. Eta neurketa arloan ere berrikuntzak izango dira.
Merkatuko azken joerak jarraitzeko eta taldeen zerbitzuak indartzeko, urteko irabazien %8 eta %10 bitartean Berrikuntza eta Garapenera bideratzen dute eta 94 teknologok lan egiten dute Gipuzkoako egoitzetan. Berrikuntzaren aldeko apustua egin dute; hori dela eta, egun dozena bat proiektutan dihardute lanean, besteak beste, Etortek, Etorgai eta Saiotek.
Fagor Automation taldearen arabera, beharrezkoa da ahalegina egitea Ikerkuntza, Garapena eta Berrikuntza arloan, merkatu kuota hobetu eta nazioarte mailan erreferente bilakatzeko. Teknologia optikoaren arloan, nazioartean gorengo mailan egotea lortu dute: AEBetako enpresa baten eskaria jaso dute, orain arte kooperatibak sortutako hornikuntza luzeena egiteko –48 metroko pieza.
