'Fracking' asmoak gauzatzekotan, kalteez ohartarazteko lanean hasi dira zenbait herritar

'Sustraia' delako planaren inguruan arreta piztu gura dute ibarreko zenbait lagunek 'fracking' delakoak sor litzakeen arriskuez ohartarazteko. Sinadurak batzen ibili ziren atzo Eskoriatzan eta sentsibilizazio lanarekin jarraitu gura dute. Bihar Arrasateko gaztetxean hitzaldia egongo da 'fracking'-aren inguruan eta Debagoiena mailako taldea eratu gura dute, eskualdean badaude-eta ustiapen asmoak.

Hauste hidralikoaren bitartez mineraletan dauden 'gas ez konbentzional' deritzatenak askatzean datza fracking delako teknikak. Eztabaida sustatu eta arreta piztu gura dute ibarreko zenbait lagunek, teknika horretatik erator litezkeen ondorioei buruz. Sinadurak jaso zituzten atzo Eskoriatzan, 131, eta bihar hitzaldia egingo dute Arrasateko gaztetxean 19:00etan.

Jaurlaritzara eroan gura dute eztabaida eta Herri Ekimen Legegilea bultzatu gura dute planen aurka. Diotenez, Gipuzkoan ez dago ardura handia oraindik "informazio gabeziarengatik" baina Deba ibaiak zeharkatzen dituen herri gehienetan, "Aretxabaletatik Mendarora arte", gauza litezke balizko ustiaketan. Esplotazio proiektuetako baten Sustraia delako eremuan aurkitzen dira Arrasate, Bergara eta Aretxabaleta, sinadura-batze taldeko kideetako batek azaltzen duenez.  Kideek salatzen dutenez, fracking-ean gasak askatzeko, gehigarri kimiko kaltegarriz jositako ur kopuru eskerga erabiltzen da. Halaber, jakinarazi dute aurreko astean bertan fracking osin batzuen ondorioz sortutako kalteengatik ordainarazten duen lehen epaia ezarri berri dela Texasen.

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.