Erantzun ona jaso du Euskalmet meteorologia agentziak martxan jarritako App berriak. Azkar lortu du 15.000 deskarga kopurua gainditzea eguraldiaren informazioa gure eskuko gailu teknologietara ekarriko digun zerbitzu honek. Guztiz doakoa izango da eta eskuragarri egongo da Android, iPhone eta BlackBerry sistema eragileetan.
Aplikazio honi esker, erabiltzaileek eguraldiaren gaineko informazioa jaso ahal izango dute, Euskal Herriko edozein txokotan egonda ere. Mugikorrean edo tabletean abisu eta alerta meteorologikoen berri izateko aukera ere ematen du. Horretarako, erabiltzaileak momentu jakin bakoitzean non aurkitzen den jakinarazi diezaioke.
App-ak eskaintzen duen beste funtzio bat radarraren seinalea zuzenean ikusteko aukera da. Modu horretan, prezipitazioak edo ekaitza noiz datorren ikusi dezake erabiltzaileak.
Teknologia berrietara egokitu
Ignacio Javier Orbe Díaz, Euskalmeteko prentsa arduradunaren arabera, "gaur egungo teknologia berrietara egokitzeko beharrari" erantzuten dio aplikazioak. "Agentziak Twitterren dituen jarraitzaile kopurua ikusita, zerbitzu praktikoago bat eskaini nahi genuen", dio.
Arabako Parke Teknologikoan kokatuta dagoen Euskalmeten zentroan egin zuten aurkezpen ekitaldia martxoaren 23an, Munduko meteorologia egunarekin bat eginez. Estefanía Beltrán de Heredia, Eusko Jaurlaritzako segurtasun kontseilaria, izan zen ekitaldian zehar jende aurrean hitz egin zuenetariko bat. Euskalmeten lana goraipatu zuen, "lan honek eguraldiaren gaineko informazioa egunean 24 ordukoa eta urtean 365 egunekoa" izatea ahalbidetzen duela adieraziz.