Ohiko zerbitzuak eskaintzen dabil Brasilgo Diadema herrian munduko lehen autobus elektrikoa. Martxoaren 5ean egin zuen lehen bidaia gainontzekoak baino isilagoa eta arinagoa den autobus honek eta egunero 170 kilometro inguru egiten ditu ordutik.
Ibilgailuaren motorra eta egitura gehiena Brasilen egin badute ere, Japoniako Mitsubishi konpainia egin da bateria eta hau kargatzeko sistemaren kargu. Egunean zehar bere ibilbidea behar bezala egin ahal izateko, litiozko ioiez osatutako hamalau bateria ditu, gauean zehar 3-4 orduan kargatzen direnak. Telefono mugikor baten antzerakoa da kargatzeko modua.
Kutsadura gutxitzea helburu
Autobusak ingurugiroarekiko konpromisoa izan nahi duela adierazi du Joaquim Lopes-ek, Sao Pauloko garraioaz arduratzen den EMTU enpresako presidenteak. Bere hitzetan "gisa honetako teknologia hirian sartzeak aireko kable asko kenduko ditu, kutsadura eta zarata gutxiagoko paisaia bat izango dugularik".
Autobusak bere ibilbidean egiten dituen 11 kilometroetan 124 bidaiari inguru hartzen ditu. Horien artean dago Evanir Souza. Dagoeneko hasi da bera zerbitzu honen abantaila batzuk nabaritzen. "Ibilgailuaren soinua igogailu batenaren antzekoa da", dio berak. "Autobus ekologiko" izena eman dio, gainera.