Euskal Herriko Hizkuntz Industrien Elkarteak (Langune) Donostian egin du batzar orokorra. 40 erakunde batzen dituen aurre-klusterra da Langune. Bere 5.058 langileak Euskadik lanean dituen biztanleen %0,63 dira. Esandako 277.692.571 euro haietatik 51.300.000 baino gehiago Languneko kideek fakturatu zituzten, eta sektoreko enplegu osoaren %24 hartzen dute Euskadin.
Itzulpenean, hizkuntzak erakusten, eleaniztasuna kudeatzen eta hizkuntza-teknologietan lan egiten duten 40 erakunde biltzen dira Langunen: enpresak, zentro teknologikoak, erakundeak eta unibertsitateko ikerketa-taldeak. Euskadiko hizkuntza-industriako establezimenduen %10 dira.
Enpresetako eleaniztasuna eta hizkuntza-teknologiak, erronka
Emaitzez gain, gaurko batzar orokorrean, Languneren 2014-2017 Plan Estrategikoa aurkeztu da, eta erronka nagusitzat dauka hizkuntza-industriak Euskadiko sektore estrategiko bihurtzea. Helburua da hiru erronka handiri erantzutea: enpresetan eleaniztasunaren kudeaketa sustatzea, hizkuntza-teknologiak bultzatzea espezializazioa lortzeko eta Euskadi beste hizkuntza gutxitu batzuentzako eredu izatea.
Plan Estrategikoak 27 proiektu garatuko ditu, eta horietatik, 19k sektoreko enpresen arteko elkarlana eta sektoreko enpresen eta inguruko beste eragile batzuen artekoa aurreikusten dute. Aipatutako epearen proiektuak garatzeko, 4,6 milioi euroko aurrekontua kalkulatu da.
Langunek ezarritako beste helburuetako bat da nazioartean erreferentziazko kluster bihurtzea.
Plan estrategikoak batzen dituen helburu kuantitatiboen artean hauek daude: esportazioen pisua bikoiztea fakturazioan; I+G+b-n %15 inbertitzea; eta Langunek orain sustatzen dituen berrikuntza-ekimen kopurua hirukoiztea. Horrez gain, sektoreko fakturazioaren eta enpleguaren %40 izan nahi ditu Langunek lau urteko epe horretan.
Zuzendaritza Batzordea berritu da
Zuzendaritza Batzordearen zati bat berritu da, parte-hartzaile berriak baitaude: Vicomtech-IK4 (IK4 aliantzaren izenean), Iametza Interaktiboa eta Elduaien hizkuntza-eskola. Elhuyar fundazioko Josu Waliñok lehendakari izaten jarraitzen du, eta MondragonLinguako Begoña Garciak, lehendakariorde.
Jardunaldia amaitzeko, Antoni Mir Clusterlingua Hizkuntza Industrien Kluster Katalanaren zuzendariak eta Iris Cordoba Madrid Plataforma del Español sarearen zuzendariak hitzaldia egin dute.
