Enpresen kudeaketa berritzen laguntzeko programa martxan da 3 milioiko aurrekontuarekin

Ekonomia Garapen eta Lehiakortasun sailburua, foru aldundietako ordezkariekin.
Enpresaren kudeaketa berritzen laguntzeko eta, modu horretara, enpresak lehiakorrago egiten laguntzeko Innobideak-Kudeabide programa martxan jarri dute Eusko Jaurlaritzak eta Araba, Bizkaia eta Gipuzkoako foru aldundiek. Gaur, egubakoitza, sinatu dute laurek Gasteizen programaren Asmoen Protokoloa. Programak 3 milioi euroko aurrekontua du.

Eusko Jaurlaritzaren Ekonomia Garapen eta Lehiakortasun Sailak azken hilabeteetan martxan jarri duen Innobideak estrategiaren barruan dago esandako programa. SPRI, Foru Aldundiak eta Euskalit arduratuko dira programa aurrera eramateaz.

Helburua da enpresa kudeatzeko metodologia, erreminta eta printzipio berritzaileak ezartzen laguntzea, Kudeaketa Aurreratuaren Eredua erreferentzia gisa hartuta, eta euskal industria-enpresak lehiakorragoak izatea.

Ezagutzaren kudeaketa, kalitate osoa, kudeaketako bikaintasuna, berrikuntza eta gizarte-erantzukizuna eta beste esparru batzuetan kudeaketa modu berrien gaineko orientazioa eskaini nahi zaie enpresei.

Programan parte hartu nahi duten enpresek www.kudeabide.com helbidera jo besterik ez dute. Datozen asteetan, aurkezpen teknikoak egingo dira Bilbon, Donostian eta Gasteizen.

Gutxienez, bost langile

Bost langileko edo gehiagoko enpresei zuzendutako programa da. Honako enpresa motak izan behar dira: erauzteko, transformatzeko eta produzitzeko industria-jarduerakoak; jardueren produkzio-prozesuei lotutako zerbitzu teknikoak eskaintzen dituztenak; edo informazioaren eta komunikazioaren gizartearen arloko enpresak.  Sozietatearen egoitza edo lantokiren bat EAEn egon behar da.

Programak bi fase proposatzen ditu enpresendako:

1. Lehenik, enpresaren kudeaketaren gaineko diagnostiko zehatza osatu beharko dute, Kudeaketa Aurreratuaren Ereduaren erreminta erabilita.

2. Enpresak ekintza-plana osatu beharko du.

Hortik aurrera, lehenengo, plan pilotua egin beharko dute, eta gero etorriko da kontsolidazioa.

Diruz lagundu daitezkeen kontsolidazio-proiektuek hasierako kontraste-txostenari erantzun behar diote, eta enpresak osatutako ekintza-planean egin behar dira.

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.