Gipuzkoak du Euskadiko familia-errenta handiena: 43.589 euro

Eustaten arabera, Gipuzkoak du Euskadiko familia-errentarik handiena: 43.589 euro. 2011. urteari, neurtu berri denari dagokio datu hori. Euskadiko batez besteko familia-errenta 42.192 euro ziren 2011n.

Araba, Bizkaia eta Gipuzkoako foru aldundiek lagunduta egin du Eustatek familia-errentaren estatistika, eta datuak argitaratu berri ditu. Bi urtean behin egiten du estatistika hori.

2011n, Euskadiko familia-multzoaren batez besteko diru-sarrerak errenta pertsonalaren bikoitza dira: 2,1 aldiz handiagoak, zehazki. Familia-errenta familiako kide guztien batez besteko diru-sarrerak batuz lortzen da. Bizkaiak 41.476 euroko batez besteko familia-errenta dauka, eta Arabak, 41.727 eurokoa.

Euskal Autonomia Erkidegoko familia-errenta %1,3 txikitu da 2009tik 2011ra bitartean, eta Araban txikitu da gutxien: %0,7. Gipuzkoan, %0,8 txikitu da, eta Bizkaian, %1,7.

Batez bestekoez haratago, baina, alde handiak daude. Hala, euskal familia gehienek (%62,5ek) batez bestekoaren azpiko errenta dute, edo errentarik ez. Familien %3,2 ez du inongo errentarik aitortu 2011n. Beste muturrean, familien %9k (76.329 familiak) batez bestekoa baino bi aldiz gehiago, edo hortik gora jaso zuten: 84.000 euro pasa. Euskal familien erdien errenta 34.104 euro baino txikiagoa da.

"Genero-arraila dago"

Sexuaren araberako desberdintasun handiak daude ere: errenta-jasotzaile nagusia gizonezkoa denean, batez besteko diru-sarrerak 46.513 eurokoak dira, eta familia horiek errenta-jasotzearen araberako erdi eta goi multzoetan daude; aldiz, errenta-jasotzaile nagusia emakumezkoa denean, familiaren batez besteko errenta 34.717 eurokoa da, eta beheko errenta-geruzetan dago familia. Eustaten arabera, "genero-arraila bat dago" errentari dagokionez.

Hiriburuen artean, Donostiak du familia-errentarik handiena, 48.741 euro; Gasteizek 42.054 eta Bilbok 41.920. Familia-errentarik handiena duen euskal udalerria Laukiz da, Bizkaian: 93.161 euro. Araban, Arrazua-Ubarrundiak, 70.355 euro, eta Gipuzkoan, Aramak, 62.275. Beste muturrean, familia-errentarik txikienak hauek dituzte: Araban, Bilar (25.826 euro); Bizkaian, Karrantza Harana (28.030 euro); eta Gipuzkoan, Pasaia (33.249 euro). Familia-errentarik handiena eta txikiena duten udalerrien arteko tartea 67.335 euro baino gehiago da. 

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.