Ikus-entzunezko Komunikazioko ikasleak eta ikasle ohiak izango dira protagonistak aurtengo Komunikaldian. Izan ere, Humanitate eta Hezkuntza Zientzien Fakultateko Komunikazio departamentuak antolatzen duen jardunaldiaren bederatzigarren edizioan, Ikus-entzunezko Komunikazioa ikasi dut. Eta orain zer? gaia jorratuko dute.
Jardunaldiaren asmoa da, aditu eta Ikus-entzuneko Komunikazioko ikasle ohien esperientzietatik abiatuta, Ikus-entzunezko Komunikazioko ikasle eta parte-hartzaileen artean etorkizuneko lan aukeren gaineko informazioa zabaltzea, eta antzeko ikasketak egin dituzten gazteek abian jarritako ekintzailetasun eta lan-esperientziak bertatik bertara ezagutzea.
Komunikazioarekin lotutako gaiak jorratzen dira Komunikaldia jardunaldian. Aurreko edizioetan landu diren gaiak izan dira: ideia-laborategiak, bideo jokoak eta hezkuntza, egile eskubideak, telebista Interneten, gure zinema gaur, etorkizuneko komunikatzaileak, tokiko telebista digitala euskaraz eta komunikazio korporatiboa.
Egitaraua
Aurtengo egitaraua lau zatitan banatuta dago: harrera, esperientzia profesionalak, MUko ikasle ohien esperientziak eta mahai-ingurua:
Hasiera:
09:00. Aurkezpena eta ongi-etorria. Iosu Zabala (MUko errektorea).
09:15. Hitzaldia, Mikel Orobengoarekin, ekintzailetasunaren garrantziaz.
Ikus-entzunezko Komunikazioko ikasleen esperientzia pertsonalak:
9:30. Amaia Elu (Hirudart 3D diseinu-estudioa eta Euskal Valley sareko partaidea).
10:00. Ruben Mateo (Beniwood ekoiztetxea).
10:30. Atsedena.
MUko Ikus-entzunezko Komunikazioko ikasle ohien esperientzia pertsonalak:
11:00. Oihane Beñaran (Bolivian, Nazio Batuen Erakundean komunikazio teknikaria).
11:30. Ane Irazabal (Freelance kazetaria Ekialde Hurbilean).
12:00. Atsedena.
Eta orain zer?
12:15. Hitzaldia, Aiala Fernandezekin: Digitalizazioaren eragina kultura-industrietan. Europako panorama zertan den.
13:00. Mahai-ingurua, goizeko hizlariekin: Ikasketak amaitu eta lan munduan murgiltzearen artea. Moderatzailea: Odei Esnaola (MUko Ikus-Entzunezko Komunikazioko ikaslea).
