EKAko Lege saileko Iñaki Velascok baloratu du Marcos Bermudez epaileak BBVA banketxearen aurka emandako epaia. "Salatariek hiru eskaera zituzten: kontratuak baliogabetzea, bertako klausula batzuk baliogabetzea eta finantza-produktuaren publizitatea legez kanpoko aitortzea eta hura etetea. Lehenengoan, epaileak ez du talde-salaketa bat aintzat hartzen, banakako 68 salaketa baizik. Eta sententziak ez ditu BBVAk hartutako Eroskiren ekarpen subordinatuen kontratu guztiak modu globalean baliogabetzen, baizik eta bakarrik salaketa-idatzian zeudenak, bakoitza banaka aurkeztu izan balitz bezala. Beste bi eskaeretan, epaileak ez du talde-salaketa aintzat hartzen, eta gainera, salatariak kostuak bere gain hartzera zigortzen ditu.
Velascoren iritziz, "aztarna guztien arabera, auzia ez da hor bukatuko", izan ere, BBVAk esan du errekurritu egingo duela, eta "Bizkaiko Lurralde-Auzitegira ailegatuko da". Adituaren iritziz, Bizkaiko Auzitegiak baliorik gabe aitor dezake egin berri den epaiketa, "eta horrek epaiketa berriz egitera derrigortuko luke". Epaiketa "luze samarra" izan daiteke, Velascoren arabera.
Aditu horren iritziz, beraz, "talde-salaketak ez dira kontsumitzaileendako inongo abantaila", izan ere, "kontrakoa dirudien arren, haien eskubideak baliatzea erraztu baino gehiago, zaildu egiten dute". Hainbeste salatari izanda, "bakoitzaren egoera zehatza aztertu behar da", eta horrek "defentsarako aukerak murrizten" ditu eta, oro har, epailearen lana "zaildu" egiten da.
Gomendio honekin bukatzen du: "Horregatik, mota honetako kasuetarako, EKAn bakarkako salaketen alde egiten dugu, Lehen Instantziako epaitegietan".
