Debagoieneko Sortuko arduradun eta udaletako hainbat hautetsik agerraldia egin dute Bergaran, zenbait kooperatibista eta langilerekin batera, Fagor Etxetresnekin gertatuaren ostean Edesako eta Geyserreko kontseilu sozial eta langileek egindako bideragarritasun plana babestuz.
Jaione Isazelaia Bergarako alkateak zera adierazi du: "Bideragarritasun plana serioa, ongi landua eta enpresari etorkizuna bermatzeko baliagarria da, eta Bergarako Geyser enpresako langile gehienen lanpostuak mantentzeko balio du. Are eta gehiago, bideragarritasun plan hori aurrera ateraz gero, Edesa eta Geyserren erabakigunea Euskal Herrian geldituko litzateke".
Gipuzkoako Foru Aldundiak bideragarritasun planari emandako babes politiko eta ekonomikoa txalotzen ditu Sortuk, eta gauza bera egin dezaten eskatu die Jaurlaritzari eta Kutxabanki. Ezker abertzaleak kezka adierazi du zentzu honetan.
"Ehun industrialak eta langileek bost importa die batzuei. Beste lehentasun batzuk dituzte; hemen lehentasuna banka eta enpresa eraikitzaile handiak dira. Eta uste dugu horiek direla lehentasuna, benetan horiek direlako agintean daudenak, horien zerbitzura dago muntatuta sistema, eta, horregatik, fagor edo Debagoieneko beste hainbat eta hainbat enpresa eta langile bizi izaten ari diren egoera ez da lehentasuna", azaldu du Ibai Redondok, Sorturen Debagoieneko arduradunak.
Eta konponbide prozesuan bezala gai honetan ere norabide berean lan egiteko gonbite zuzena egin dio Sortuk EAJri. Jeltzaleek sozialista eta popularrekin batera Gipuzkoako Batzar Nagusietan atzo eragindako fiskalitate arloko aldaketak, ordea, ez ei du bide zuzena erakusten.
"PNVk, PPk eta PSE-EEk osatzen duten oposizioak, elkarrekin, Gipuzkoan zegoen fiskalitate progresibo hori bertan behera utzi dute eta gaurtik aurrera gipuzkoar guztiok pairatuko ditugu horren ondorioak, gutxi batzuk aberatsago izango dira eta, orokorrean, langileok eta pertsonok askoz kaxkarrago egongo gara", zioen Redondok.
Amaitzeko, krisiaren irtenbidea ezkerretik datorrela adierazi die Sortuk herritarrei, burujabetza eta eraldaketa soziala direla irtenbidea.
