Ordubata jo baino lehen heldu da Edesako langileen 'Martxa Urdina' Arrasatera. Ordurako baina, ez zen urdina bakarrik, Fagor Etxetresnetako langileek -kamiseta gorriak soinean zituztela- eurekin bat egin baitute.
Ehunka langilek batera egin dute Mondragon Korporazioaren egoitza nagusira arteko bidea, Edesa Fagor parekatzea leloa zuen pankartarekin. Fagor eta Edesa ez ixteko, nahi izanez gero lana mantendu daitekeela eta borrokan jarraitzen dutela adierazteko oihuak egin dituzte bidean. Taldearen ate aurrera helduta, manifestazioak aurrera jarraitu du baina hainbat pertsona eranskailuak jartzen geratu dira.
Hartutako konpromisoa gogorarazten
Egoitzaren atzealdera joan da manifestazioa eta hamar minutuz bertan kontzentratuta egon dira. Berriro behera abiatu aurretik, Edesako adin jakin bateko langileendako irtenbiderik ez dutela aurreikusi eta Mondragon Taldeak bideragarriak diren enpresak mantentzeko konpromisoa hartu zuela ekarri dute gogora.