"Berrestu egiten dugu pertsonen protagonismoan eta elkartasunean oinarritutako bere eredu kooperatiboaren baliagarritasun eta indarra. Ez dugu uste, inondik inora, eredu kooperatiboa kolokan jarri behar dugunik, nahiz eta Fagor Etxetresna Elektrikoak egoera zailean egon. Izan ere, oso dibertsifikatuta dauden industria sektoreetan liderrak diren enpresak ditu MONDRAGONek, hala nola, makina erremintan, jasokuntzan, kontsumo ondasunetan, industriarako osagaietan, automozioan, aholkularitzan, edo eraikuntzan. Fagorri dagokionez, gure bailaran aski ezaguna denez, etxetresna elektrikoen sektorera bakarrik mugatzen ez den marka bat da, beste zenbait industria jardueratan punta-puntakoak diren kooperatiben merkatu ikurra ere baita, adibidez, automozio, osagai elektroniko edo ekipo ondasun sektoreetan. Beraz, konfidantza osoa agertu nahi dugu gure eredu kooperatiboan.
Ezaguna da baita ere, zenbait elkartasun mekanismo dugula komunean eta mekanismo horiek taldea osatzen duen kide bakoitza indartu egiten dute. Mekanismo horiek sorreratik funtzionatu dute eta baliagarriak izan dira kooperatiben nazioartekotze eta berrikuntza programak abiatzen laguntzeko, jarduera berriak garatzeko eta zailtasunak dituzten kooperatibei laguntzeko. Mekanismo horiek indartu egingo ditugu egoera zail honi aurre egiteko, eta Korporaziotik dagoeneko konpromisoa sendoa hartu da negozio berrien promozioa sustatzeko, lanpostu aukera berriak sortzeko; eta langabe geratu diren pertsona guztiei konponbide bat emateko asmoz. Elkartasunak ekarri gaitu honaino, eta elkartasunean oinarrituko da gure etorkizuna, batez ere oinarri horretatik etorriko baita Fagor Etxetresna Elektrikoetako hainbat bazkide eta langileren egoerari buelta emateko aukera".