Gipuzkoako Auzitegian aste honetan egin dute 2011ko martxoko Bergarako gertakarien epaiketa. Epaimahaiak erailketagatik errudun jo du Domingos F.G., 51 urtekoa. Frogatutzat jo du hiltzeko asmoarekin erasotu zuela biktima, aprobetxatuz, gainera, gaixotasunagatik, ebakuntza bategatik eta lasaigarriak hartu izanagatik, erantzun-gaitasuna gutxituta zuela Miguel E.R. 46 urteko pisukideak.
Herri epaimahaiak ontzat hartu du prozesuan akusazioek –batez ere Fiskaltzak– emandako bertsioa: eztabaida gogorra izan zutela pisukideek 2011ko martxoaren 10ean, bizitoki zuten San Antonio kaleko 8. zenbakiko etxebizitzan. Borrokan hasi eta akusatuak heriotza eragin ziola biktimari. Laban bat eta mozteko erabiltzen den beste tresna bat ei zituen gertaeren unean. Gero, Deba ibaira bota zuen gorpua.
Akusatuaren argudioak, berriz, ez ditu onartu apaimahaiak, bat izan ezik: hildakoak ez zituela ordaintzen zegozkion gastuak, egongelaren jabe egin zela eta etxeko sarraila aldatu ere egin zuela, pisukideari giltzarik eman gabe, akusatuaren haserrea eraginez.