Bertsozale Elkarteak antolatzen duen zortzigarren txapelketa honetan, 14 saio izango dira eta 43 bertsolarik, 14 gai-jartzailek eta epaile lanetan 16 lagunek hartuko dute parte.
Protagonisten ikuspuntutik
Bertso Txapelketa Nagusiaren ateetan, debagoieneko bertsolarien iritziak batu ditugu. Ainhoa Agirreazaldegi izango da taularen gainera igoko den lehena; bertso saioak kokatzerakoan, antolatzaileek lurraldetasuna zaindu dutela dio eta orokorrean aurten esanahi zein teknika aldetik landutako jendea dagoela, akaso gazteen freskura faltako dela gaineratuz. "Aurreko txapelketatik hona, aldaketa asko bizi izan ditut; hori horrela, teknikoki baino, mamitik gurako nuke nire ekarpena igartzea" dio elgetarrak.
Manex Agirre aramaioarrak lehen aldia du Txapelketa Nagusian: "Umil-umil eta kanporaketa bakarrik helburu hartuta joango naiz ahal dudan guztia egiten saiatuz". Aurtengo Txapelketa, interesgarri datorrela dio, parte-hartzaileak gogotsu ikusten dituelako eta Agirreren ustetan, freskura egongo da. Aretxabaletan bizi diren Maddi Sarasua eta Miren Amurizarekin lehiatuko du Agirrek Oionen. Aurkariak baino lagunak direla dio, gaineratuz, saio horretan igarriko dela Txapelketan eskarmentua duten eta lehenekoz parte hartzen dutenen arteko aldea.
Txapelketako gazteena da, jatorriz Itsasukoa den Maddi Sarasua. Urduri baina, era berean, ilusioz dagoela kontatu digute Aretxabaletako familiakoek. Sarasuarekin ederto bat egiten duela dio Miren Amurizak: "Ni orain lau urte nengoen moduan egongo da seguru, zorterik onena opa diot; ni berriz, lasai eta gogotsu nago. Finalera begira aldaketak egon daitezkeela uste dut".
Goiena Telebistan ere ikusgai
Goiena Telebistaren bitartez ere jarraitu ahal izango da txapelketa, Tokiko telebistek EITBrekin duten hitzarmenari esker.
Sarrerak on-line salgai eta finalerako, debagoienean ere bai
Dagoeneko salgai daude kanporaketa zein finalerako sarrerak, bertsosarrerak.eu atarian. Horrez gainera, izango da debagoienean finalerako sarrerak erosteko aukera ere:
- Arrasaten: Irati ta Monten tabernetan
- Bergaran: Jardunen
- Oñatin: Txokolaterixan
- Aramaion: Eki tabernan