Euskara planaren amaiera ospatu dute Elay Taldekoek

Herriko jaiekin bat eginda, ospakizuna izan dute gaur, eguena, Antzuolako Elay lantegian. Izan ere, 90eko hamarkadan hasi zuten euskalduntze planaren amaierara iritsi dira: euskaraz egiten dute lan, gaur egun, Elayn. Hori horrela, eta ahalegin horretan langileek egindako ekarpena eskertzeko, ekitaldi berezia egin dute eguerdian Antzuolan. Bertan izan dira Jaurlaritzako Hizkuntza Politikarako sailburuordea eta Kontseiluko eta Elhuyarreko kideak. Elay aitzindaria izan da lan munduan, euskarari dagokionez.

Euskara lantegian txertatu eta zabaltzeko lanean ardura zuzena izan du Anaje Narbaizak. Horregatik, bere ibilbideagatik eta urte hauetan euskararen erabilera lan munduan normalizatzeko egindako ekarpenagatik, Narbaiza saritu zuten ekain amaieran. Bai Euskarari Laguna saria eman zioten ekainaren 28an. Ametsa kolektiboki bete dela nabarmentzen du gaur Narbaizak. 90eko hamarkadan hasitakoa amaitu da baina ez, ordea, lana. Fase berri bati ekingo diote orain Elayn, munduan zehar –Mexikon eta Txinan– dauzkaten lantegietan euskararen lekua aurkitzeari.

1992an euskara plana abiatu zuen Antzuolako Elay enpresak eta lan munduko lehen esperientzia aitzindaria izan zen hura. Egun, euskara plana desagertu da Elayn, euskara egunerokotasunean txertatzea lortu baitute.

Aitzindari eta erreferente

Lan munduaren euskalduntzean aitzindaria izan zen Elay, beraz, eta, horregatik, erreferente da. Hala azpimarratu du ekitaldian Kontseiluko Bai Euskarari Ziurtagiriaren Elkartearen arduradun Roberto Gutierrezek.

Elay Taldeko euskara planak hasiera hasieratik izan du Jaurlaritzaren bultzada, diruz zein laguntasunez. Ekitaldian Patxi Baztarriika Hizkuntza Politikarako Saiburuordea ere izan da eta gakoa langile guztien konpromisoan egon dela adierazi du.

Jose Luis Elkoro gogoan

Ospakizun eguna izan da gaurkoa eta baita langile guztiei egindako ahalegina eskertzekoa ere. Ekitaldian bereziki gogoan izan dute Jose Luis Elkoro, ezin izan duelako bertan egon. Hark eman zion lehenengoko bultzadetako bat Elayri.

Urte guzti hauetan, gainera, enpresa euskalduntzeaz gain, 89 langile alfabetatu dituzte Elayn.

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.