Enpresei dagokienez, "azken hilabeteotan Hego Euskal Herriko hainbat enpresak eta eragilek Kontseiluak lan mundua euskalduntzeko dokumentuari egindako ekarpenak egin izan dizkiote, eta horren ostean, zenbait enpresarekin batera Kontseiluak lan-saioa antolatu zuen. Konferentzian MAPSA, BATZ eta IMH enpresetako ordezkariek ekarpen horiek eta ondorioak aurkeztuko dituzte", azaldu dute Kontseilutik.
CCOO, ELA eta LAB
Sindikatuen arloan, berriz, "hiru sindikatuk egin dizkiote ekarpenak Kontseiluaren dokumentuari, eta, ondorioz, CCOO, ELA eta LABeko ordezkarien ekarpenak entzuteko aukera izango da Konferentzian", gaineratu dute.
Kontsumitzaileen elkartearen funtzioa
Kontsumitzaileen esparruan, kontatu dute Euskal Kontsumitzaileen Antolakundeko Jose Luis Segurak hitzaldia eskainiko duela "lan munduaren euskalduntzean kontsumitzaileen elkarteek bete dezaketen funtzioaz".
Erakundeen garrantzia
Eta erakundeei dagokienez, haiek lan munduaren euskalduntzean duten garrantzia aitortuta, "Arabako, Bizkaiko eta Gipuzkoako Aldundietako zein Eusko Jaurlaritzako ordezkarien iritziak jasotzeko aukera egongo da", azaldu du Paul Bilbaok, Euskararen Gizarte Erakundeen Kontseiluko idazkari nagusiak.
Kataluniako esperientzia
Azken horiekin, erakundeekin segituz, Kataluniako Generalitateko ordezkari Joan Ramon Sole Durany ere izango da gaurko hizlarien artean gonbidatu, "beste hizkuntza-komunitate batzuetan aurrera eramandako politiken garrantzia" azaleratu gura du-eta, Kontseiluak.
Garaia da, eta posible da
Jardunaldia borobiltzeko, Kontseiluak prestatu duen Lan mundua euskalduntzeko adierazpena aurkeztuko dute: "Lan munduaren euskalduntzean urrats esanguratsuak ematea beharrezkoa da, garaia dela eta posible dela uste dugu. Are gehiago, bideragarria eta eskuragarria dela uste dugu. Horrexegatik Kontseiluak bere ekarpena egin nahi du, bai eta lan munduaren euskalduntze prozesuan erantzukizunez konpromisoa hartu ere", gaineratu du Kontseiluko ordezkari Paul Bilbaok.