Tokian tokiko esperientzien atalean hitz egin du Errazkinek eta, harekin batera, Giorgio del Ghingaro, Italiako Capannori udalerriko alkatea -2020rako Zero Zabor aldarrikapena egin duen Europako lehen hiria- eta Janez Potocnik Europako Ingurumeneko komisarioa aritu dira. Entzuleen artean, Europako Parlamentuko hainbat taldetako ordezkariak zeuden: berdeak, liberalak eta sozialistak, besteak beste.
Janez Potocnikek Gipuzkoako esperientzia "adierazgarria" eta "garrantzitsua" dela eta "ikasteko" balio dezakeela esan du. Gipuzkoako Foru Aldundiko Ingurumen sailetik jakitera eman dutenez, "Europako Ingurumeneko komisarioak argi esan du ezin dela birziklagarria den ezer zabortegietara bota edo erraustu; zabortegiak itxi behar direla eta errausketa oso urrun dagoela hondakin alorrean Europako Batasunak ezarritako hierarkiaren lehen lerrotik". Horri gehitu dio Potocnikek adierazi duela errausketa ez dela hondakinak kudeatzeko modurik egokiena.
Goizean, aurkezpena egin baino lehen, Gipuzkoako ordezkaritzak Andrea Zanoni Europako Demokraten eta Liberalen Taldeko europarlamentari italiarrarekin egin du bilera, eta Zanonik mintegian adierazi du "Europako Batasunak Zero Zabor politikak gehiago bultzatu" behar dituela.
Iñaki Errazkin Ingurumeneko diputatuarekin batera, Juan Karlos Alduntzin GHKko lehendakaria eta Hernaniko eta Orendaingo alkateak daude Bruselan.