Ikerketa argigarria
Carlo Daffara adituak egin du Europa mailako lehen ikerketa eta hark erabilitako datuen arabera Europako administrazio publikoek 450 mila milioi euro aurreztuko lituzkete software pribatiboa librearengatik ordezkatuko balute. Baina aurrezte mailarik handiena ez da lortzen programa libreek gutxiago balio dutelako, garatzaileek programak egokitzeko denbora gutxiago behar dutelako baizik. Kasurik gehienetan berrerabili egin daitezke aurreko garapenak eta modu merkean kalitate handiko kodea erabil daiteke aplikazioetarako. Garapenerako erabiltzen den denbora gutxitu egiten da horrela eta, guztira, askoz ere merkeagoa da programa eta aplikazio libreak erabiltzea. Ikerketa berak dio, gainera, software librea darabilten enpresa eta erakundeak askoz ere produktiboagoak direla eta emaitza hobeak lortzen dituztela. Software libreak, hain zuzen, denbora eta dirua aurrezten dituela frogatutzat eman du ikerlariak datu horiekin.