Lehenengo seihilabeteko euskal gastronomiari lotuta egongo da eta horrekin lotuta hiru jarduera nagusi burutuko dira. Unibertsitateko jatetxean ikasleek prestatutako euskal sukaldaritzako 80 plater eskainiko dira. Horretaz gain, euskal sukaldaritzako plater esanguratsuak irakasteko ostegunero sukaldaritza-zaleei zuzendutako ikastaroak egongo dira. Azkenik, hamabost egunetik behin euskal produktuen eta gastronomiaren inguruko hitzaldiak izango dira.
Laurogei plater ezberdin
Urritik otsailera bitartean, 80 menu desberdin eskainiko dituzte unibertsitateko kafetegian ikasleek. Plater hauek euskal gastronomiako plater tradizionalak edo esanguratsuak izango dituzte oinarri, baina horretaz gain ukitu berritzaileak ere izango dituzte. Menuan aperitiboa, bi plater eta postrea sartzen dira.
Euskal sukaldaritzari buruzko ikastaroak
Saio hauek ostegunetan izango dira 19:00etatik 21:00etara bitartean. Saio bakoitza Arabako, Bizkaiko edo Gipuzkoako sukaldari batek gidatuko du eta beraien eskutik plater ezberdinak ikasteko aukera izango da. Besteak beste, Gipuzkoako Iribar jatetxeko Pili Manterola, Zuloaga jatetxeko Alberto Zuloaga bilbotarra eta sukaldariaren izena daraman hoteleko Hector Oribe arabarra izango dira.
Hitzaldiak
Hamabost egunean behin euskal gastronomia publiko orokorrera zabaltzeko asmoz euskal erreferenteak diren hainbat sukaldarik 9 hitzaldi emango dituzte. Hauetan euskal produktu eta gastronomiari egingo zaie erreferentzia. Hitzaldiak 18:00etan izango dira Basque Culinary Centerreko auditorioan, edonork dauka joateko aukera eta sarrera doanik izango da.
Hiru jarduera nagusi hauez gain beste hainbat jarduera ere burutuko dira lehengo seihilekoan. Zaleentzako ikastaroak eta sukaldaritzari buruzko lantegiak besteak beste. Urtearekin amaitzeko bigarren seihilekoari dagokionez, espainiar gastronomia izango du oinarri autonomia erkidegoetako gastronomiak ere kontuan hartuta.
