"Arlo honetan esperientzia handikoa da Errazkin. Ardura honek eskatzen duen ezagutza eta esperientzia ditu kudeaketa publikoan nahiz arlo honi dagokion gestioan. Neure kabineteko buru izan da orain arte eta azpimarratu nahi dut lan aparta egin duela urtebete honetan. Gobernu honen konfiantza oso-osoa du. Ez da ahaztu behar gobernu honen apustua dela hondakinen kudeaketarena, bere osotasunean, eta ez diputatu bakar batena", adierazi du ahaldun nagusiak.
Horri gehitu dio "batzuen interesagatik halako zalaparta zentzugabea sortu duen aferari, hondakinen arazoari, konponbidea emango dion bidean jarraitzeko konbentzimendu osoa" dutela Gipuzkoako gobernua osatzen dutenek, eta "konbentzituta" daudela, "konfiantza osoa" dutela, bide hori "ondo baino hobeto" gauzatuko duela Iñaki Errazkinek, Ingurumen eta Lurralde Antolaketa diputatu berriak.