Debagoieneko Zero Zabor taldeak egindako lana apirilean egindako Zero zabor Astean aurkeztu zuten. 70 minutuko iraupenarekin, lau hilabeteko lanaren emaitza da eta, edukiari dagokionez, honela laburtu du Ander Lizarralde taldeko kideak: "Dokumentalean kontatzen da Gipuzkoan badela aspaldi onartu zen hondakinak kudeatzeko plan bat (PIGRUG) eta nola plan hori idatzi zutenak zementuaren sektorearekin guztiz lotuta dauden. Ondorioz, plan hori guztiz bideratuta dago Gipuzkoan errauskailu bat jartzera. Eta interes enpresarial horiekin zuzenean lotuta dauden alderdiak hasi zaizkigu jarrera erasokor batekin atez atekoa belzten, 5. edukiontzia loratzen, herri galdeketak eskatzen eta egia erdizko argumentuak plazaratzen".
Horren aurrean, dokumentalaren helburu nagusia "egia erdi horiek eztabaidetan zilegitasunik ez dutela salatzea" dela esan du Lizarraldek.