Dagoeneko badira 30 urte lehenengo Korrika egin zela; Oñatin hasi eta Bilbon amaitu zen edizio hura. Aurtengoa 17.a izango du. Apirilaren 7an hasita, Trebiñutik Donostiarako bidea egingo du, beti bezala, euskararen aldeko helburu garbiarekin.
Helburuak
Aurtengo Korrikaren leloa Euskalakari da eta euskara maitatzeko, ikasteko eta erabiltzeko deia izan nahi du. Korrikaren helburuetariko bat hizkuntzaren iraupena eta normalizazioa bermatzea da, baina badu bigarren helburu bat ere; Euskal Herri osoan zehar AEK-k dituen 100 euskaltegien jarduna finantzatzea.
Ibilbidea
Debagoienera apirilaren 14an iritsiko da; Elgetatik sartuko da 5:00etan, eta ondoren bailarako txoko guztietatik pasako da, Angiozar, Bergara, Antzuola, Oñati, Arrasate, Aramaio, Aretxabaleta, Eskoriatza eta Leintz Gatzagatik.
Ver Korrika 17 Debagoienean en un mapa más grande
- Elgeta: 05:06:03
- Angiozar: 05:38:33
- Bergara: 06:24:03
- Antzuola: 06:56:33
- Urretxu: 07:29:03
- Zumarraga: 07:48:33
- Urretxu: 08:08:03
- Legazpi: 08:21:03
- Oñati: 10:10:03
- Arrasate: 11:28:03
- Aramaio: 12:20:03
- Aretxabaleta: 13:25:03
- Eskoriatza: 13:44:33
- Leintz-Gatzaga: 14:30:03
Korrika batzordeak eta egitarau zabala
Korrika, baina, ez da lasterketa ludiko hutsa, Korrikak makina bat ekitaldi antolatzen ditu gurean eta euskal kultura zabaltzeko ere aproposa da. Horiek antolatzen herri guztietan batzordeak lanean aritu dira eta euren lanaren erakusgarri da apirileko egitarau zabala.
Lan horretan parte hartzen ari diren guztiei eskerrak eman nahi izan dizkiete antolatzaileek eurek egin dutelako posible Korrikaren egitaraua; apirilean, beraz, gurean ere hainbat kantu afari, bertso afari, mendi irteera, antzerki emanaldi, Korrika txiki eta kontzertu egongo dira.
Euskaltzaindiari omenaldia
Ekitaldi horiez gain, Euskaltzaindia ere omenduko dute aurten; Arrasaten, apirilaren 14an Korrika herritik pasa ostean plazan egingo dute ekitaldia. Euskaltzaindiko ordezkari bezala, Aramaioko Patxi Uribarren omenduko dute. Uribarren omentzeko arrazoiak izan dira; bata, gure eskualdekoa dela, eta bestea, euskararen aldeko herri ekimenari egindako goraipamenak egitea.
Parte hartzeko deia
Bukatzeko, antolatzaileek deialdia egin diete herritar guztiei antolaketan parte hartu duten moduan, orain datozen ekitaldietan parte hartzeko, eta nola ez, Korrika egiten eta euskara erabiltzen jarraitzeko.
