Elkargiko arduradunen esanetan, "berankortasuna (morositatea) haztea ezaugarri nagusi" izan zen urtean, Elkargik bere kaudimena (solbentzia) areagotzea lortu zuen: %10,13tik %12,22ra pasatu zen. Zergen aurreko emaitzak 2,8 milioi eurokoak izan ziren.
Arduradunek uste dute Elkargiren balioa eta solbentzia ziurtatzera jo behar dutela aurten: "Aurreko urtean gertatu bezala, ekonomia eta finantzaren aldetik, eta enpresen aldetik egoera konplexua eta zaila denez, berankortasuna (morositatea) faktore erabakigarria izango da oraindik, eta horrek ezinbestean eskatzen du, oraindik ere, Sozietatearen balioa eta kaudimena bermatzera bideratutako duen kudeaketa eramatea, horregatik enpresen finantza-beharrei erantzuteari utzi gabe".
Euskadi, Eurogunearen pareko
Elkargik 2010eko egoera baloratu du eta 2011rako bere aurreikuspenak plazaratu ditu. Elkargiren esanetan, "herrialde garatu gehienak atzeralditik atereak dira, susperraldia motela eta luzea eta, nolanahi
ere, desberdina izango dela dirudien arren. NDFak egindako azken aurreikuspenen arabera, 2010ean munduko BPGa %4,8 igo izango litzateke, garatze-bidean dauden ekonomien hazkundea, berriz, %7,1an kokatuko litzateke, eta ekonomia aurreratuena %2,7an". Baina horren barruan ere aldeak egongo dira: AEBak %2,6 haziko dira; Japonia, %2,8, eta Eurogunea, %1,7.
"Espainiako Bankuak Espainiako ekonomiarako egindako aurreikuspenaren arabera, %0,1 jaitsiko da. Itxura guztien arabera, Espainiako ekonomiaren irteera krisialditik Europako beste herrialde batzuetan baino motelagoa eta luzeagoa izango da; egitura ekonomiko desberdina izatearen, defizit publikoaren mailaren eta langabezia-tasa altuen ondorioz", gaineratzen du Elkargik.
Euskal ekonomia zertxobait hobeto dago eta Eurogunearen antzekoagoa da: "Euskal ekonomiarako hazkunde-aurreikuspenak %1,4koak dira eta bi hiruhilekoz jarraian darama urte arteko tasa positiboekin (industria-sektorearen kanpoko saldoak eragina du BPGaren ekarpen positiboan). Aipatzekoa da euskal enpresa-ehuna
egiten ari den apustua dimentsionatzeko eta nazioartean hedatzeko, hori funtsezkoa baita haren etorkizuna bermatzeko".
Ohitura berriak finantzetan
Elkargik krisiaren amaiera ikusten du, baina "aldaketak" ekarriko dituela ohartarazten du, batez ere finantza-merkatuetan. "Ohitura berriak" etorriko direla esaten du, eta enpresak finantzatzeko moduan "eragina" izango dutela uste du Elkargik: "Iraganean onartutako zorpetze-mailak aurki ez dira onartuko. Arriskuarekiko gaitzespen handiagoko garaiari aurre egin behar diogu. Orduan, likidezia-arazoak argi eta garbi bereiziko dira ondare-arazoetatik, eta enpresek baliabide propio gehiago izan beharko dituzte". Horrenbestez, Elkargiren ondorioa da "kreditu gutxiago emango" direla, horiek lortzea "zailagoa" izango dela, eta kostu handiagoa izango dutela.