CiUren azken orduko atxikipenarekin, emendakinak aurkezteko epearen amaieraren azken orduetan, Sinde legeari bultzada berria emateko hitzarmena lortu dute PSOEk eta PPk. Hortaz, emendakin batekin Espainiako Senatuan aurrera egitekoa da ziber-kalapitaren legea. Aldekoek diotenez, berme judizialak indartuko dira eta berme berriarekin.
Salaketa prozesua
Hain zuzen, aldaketarik nabarmenena alor horretan egin dute, izan ere, testu berrian zehazten da webgune bat ixteko prozesuaren lehen fasean epaile batek hartuko duela esku. Hortaz, legearen arabera, honako hau izango litzateke garapena: Egile eskubideen titularrak Jabetza Intelektualaren Batzordeko Bigarren Sekzioan salatuko luke bere obra baimenik gabe estekatzen duen webgunea. Une horretan sartuko litzateke modifikazioak dakarren epailearen lana ze aipatutako batzordeak epaile horren baimena beharko du webgunearen identifikazio datuak jakiteko.
Epeak ere laburtu dituzte
Epaileak batzordearen eskaera horri 24 orduko epean erantzun beharko dio eta behin baimena jaso eta webgunearen kudeatzaileak ohartarazita, hauek 48 orduko epea izango dute lotura horiek borondatez ezabatu ala beharrezko jotzen dituzten alegazioak aurkezteko. Estekak ez badira erretiratzen, hiru egunetako epean argitaratuko da epaia eta prozesu guztiak 15 eta 17 egun bitartean iraungo du.
Gauzak horrela, alde guztiak bat datoz eta baieztatzen dute, ministroak agertu moduan, "azaleko erreforma dela" eta, honenbestez, Senatuan onartuko dutena Sinde lege zalapartatsuaren kalko hutsa dela ia. Kontuak kontu, aurreko bertsioan bezala, lege honetan batzorde batek hartuko luke webgune bat ixteko erabakia eta epaile batek betearaziko luke. Epaileak soilik ixte hori aztertuko luke neurriak, besteak beste, Espainiar Konstituzioaren 20 artikulua urratuko balu.