Hiltegiko presidente Pedro Iturbek azpimarratu du, sektorea indartu beharra dagoela, egun enpresa handiek sektorea asimilatzen dutela, eta horregatik, bera babestu eta indartzeko politikak martxan jarri nahi dituztela.
Ganadu ustiategi txikiak, baserriak alegia, eta baita hiltegi txikiak ere mantendu behar direla azpimarratu dute agerraldian.
Kanpoko haragia
Adierazi dute, askotan hemengo okela jaten dugula uste dugula baina hemen kontsumitzen den haragiaren %40a bakarrik dela hemengoa. Gipuzkoako Sagardotegietan eta jatetxeetan ere, ez dela gure baserrietako okela jaten gaineratu dute. Abere hiltegia errentagarria izateko, urtero 560 buru hil behar direla adierazi dute, eta gaur egun 450 hiltzen dira.
Gaineratu dute azken urteotan Eusko Jaurlaritzak abere hiltegi txikiak ixteko apustua egin duela, eta hiltegien zentralizazioa bilatzen zuela. 2004an, Gurokela taldea sortu zenean, abere askok Bilborako bidea hartu zutela ere gaineratu dute, horrek kostuak gehitzea suposatzen duelarik.
Prozesua merkeago eta gertuago
Oñatin hiltegia izateak prozesua merkatuko luke eta lekukotasunak eta kalitateak hartuko luke garrantzia. Orain arteko kudeaketa ere zuzena izan bada ere, proposamen berri horrek baserritarrak, hiltegi eta harakinak elkarlanean ibiltzea ahalbidetuko lukeela esan du Iturbek, bitartekaririk gabe.
Zerbitzua martxan jartzeak 250.000 euroko kostua izango luke.
Gaineratu dute, lehenengo sektorearentzat eta bailararako orokorrean hiltegia gakoa dela eta guztion konpromisoak beharrezko direla gaineratu dute. Alegia, baserritarrena, harakinena, kontsumitzaileena, sindikatuena, langileena, eta baita alderdi politikoena ere.