Biharko festa, egunotako astebeteko hitzaldi zikloa, enpresa zientzien fakultatearen 50 urteko historia jasoko duen Jose Antonio Azpiazuren liburua... orain arte ETEO izan dena eta aurrerantzean Enpresagintza fakultatea deituko dena ospakizunetan murgilduta dago jada. Eta ospakizunak urte osoan luzatuko dira gainera, urrian inauguratuko dituzten Ibarra guneko instalazio berriekin eta azaroan Donostian egingo duten ekitaldi nagusiarekin.
Historia
Eguerdian egin dute ospakizunok aurkezteko ekitaldia, eta fakultatearen historiaren errepasoa ere egin dute bertan. On Jose Maria Arizmendiarrietak sortu zuen fakultatea, bi helbururekin: Arrasateko lanbide heziketa zentroko prestakuntza kudeaketa-ezagutzez osatze, eta prestakuntza hori eskualde osora zabaltzea. 20.000 ikasle izan ditu mende erdi honetan, eta 1.500 pasatxo dira egun graduetan, graduondokoetan eta etengabeko formakuntzan ari direnak. Urteotan, bataz beste, % 96 izan da ikasleen laneratze indizea.
Fakultate berria
Azkenaldian Irunen eta Oñatin instalazio berriak egitera ahalegin handia bideratu du. Oñatin, 13 milioi euroko aurrekontua izan dute fakultate berriko lanek. Hiru alorretarako eraikina izango da.
Fakultateak 2,5 milioi euroko sarrerak izan ditu orain arte ikerketan
eta garapenean egindako lanagatik, zentroaren aurrekontuaren % 35.
Aurrerantzean, gainera, batera jardungo dute lanean Enpresagintza
fakultateak eta MIK ikerketa zentroak.
Instalazio berriek ia 9.000 metro koadro izango dituzte. Orain arteko
egoitza, berriz, Udalarena da, eta berak erabakiko du aurrerantzean ze
erabilpen eman.