Duela bost urte, Danobat kooperatibaren sorreraren 50. urteurrena zela eta, liburu horren lehenengo edizioa argitaratu zen. Hainbat bazkideren esperientzia eta lankidetzarekin egin zen hori. Ekimen horrek arrakasta handia izan zuenez, bigarren edizio hau "hobetuta eta eguneratuta" dago Mondragon Unibertsitatearen lankidetzarekin, arduradunek diotenez.
Eskuliburuaren edukia
Liburua tailerretan, eta zehatzago Makina-Erremintaren sektorean, aritzen direnei zuzenduta dago (adibidez, muntatzaileak, diseinatzaileak eta mekanikoak), baita alor horretan lan egin nahi duten egungo unibertsitateko edo lanbide heziketako ikasle direnei ere.
Arduradunek honela aurkezten dute liburua: "Alde batetik, diseinatzaileendako oso erabilgarria den informazioa jasotzen du (oinarrizko kalkulua, trigonometria, materialen ezaugarriak, transmisioen kalkulua, ergonomia, e.a.) eta bestetik, muntatzaile eta mekanizatzaileendako baliagarriak diren hainbat taula (hari ezberdinen neurriak, errakore mota ezberdinak, unitate aldaketak eta makinen osagai ezberdinak eta plakatxo, harri edota zerrei buruzko datuak ere). Horrez gain, eskuliburuak elektrizitatea eta elektronikako oinarrizko formulario bat eta hiztegi txiki bat jasotzen ditu.
Argitaratutako 1.500 aleak Danobateko langile, bezero, hornitzaile eta Mondragon Unibertsitateko ikasle eta irakasleek eskuragarri izango dute. Era berean, Mondragon Unibertsitateak eskuliburua bere prestakuntza zentroei eskainiko die. Liburua abenduaren 4tik 8ra ospatuko den Durangoko Liburu Azokan salgai egongo da Mondragon Unibertsitateko standean.
Liburuaren kontsulta errazteko asmotan, formatu digitalean aurki daiteke Danobat eta Mondragon Unibertsitateek dituzten web guneetan. Ondoko helbideetan:
www.danobat.com
www.mondragon.edu