Toki araubidearen oinarriak arautzen dituen legean oinarritu dira eta, berez, Espainiako Ministroen Kontseiluari ahalmena ematen dio horrek Udalak desegiteko. Araudi horretan bertan zehazten da udalbatzak bertan behera utz daitezkeela hura osatzen duten kideek "terrorismoari babesa edo laguntza emanez gero, modu errepikatu eta larrian" edo "biktimak gutxiesten edo umiliatzen dituzte ekintzak babesten badituzte".
Legeak horixe zehazten du baina Espainiako zenbait hedabidetan argitaratu berridenez, "terrorismoa babesteko" ekintzok modu errepikatuan gertatu ez direnez ezin lirateke desegin.
Elorrio eta Hernani
Bi kasu zehatz aitatzen dira txosten berean. Bat Elorrioko Udalari dagokio "preso eta errepresaliatuen batzordea" eratzeagatik eta Hernanikoa, kasurik ezagunena, hango alkateak ekitaldi baten presoen aldeko txaloak eskatzeagatik. Biak ala biak, terrorismoa babesteko ekintza moduan ulertu ditu Gorenak baina ez dute, antza, balio "terrorismoaren aldeko" berrespen moduan.
Era berean, Gorenak ez ditu ikusi "garrantzitsu"· moduan, hainbat Udalek AHTaren aurka egindako adierazpenak, txostenean jasotzen denez.
Deseginez gero, Aldundiak bereganatuko luke kudeaketa
Momentuz, beraz, ezingo dira ANVko kide ohiek osatutako Udalak desegin. Hala ere, aitatutako baldintzak bete eta Ministroek Udalbatzak desegitea erabakiko balute, Estatuaren Abokatuaren txostenak zer gertatuko litzatekeen eransten du. Kasu horretan, Udalak Foru Aldundiaren esku geratuko liratekeela ezartzen du txostenak, hurrengo hauteskundeak deitu arte, hau da, 2011an.